Koreano nagpusil sa dughan

CEBU, Philippines — Usa ka 87-anyos nga Korean national ang gikatahong nagkutlo sa iyahang kinabuhi pinaagi sa pagpusil sa iyang kaugalingon, apan sa wala pa niya kini buhata, naghimo na kini og kaugalingon niyang lungon nga iyang gitugon nga maoy gamiton kun motaliwan na siya sa kalibotan.

Ang maong Koreano giingong naguol tungod sa gihambin niining balatian. Diha siya nagpuyo sa Sitio Lower Bangkal, Barangay Guba, dakbayan sa Sugbo.

Sa impormasyon sa Talamban Police Station 8 Cebu City Police Office(CCPO), Huwebes sa hapon, Disyembre 19 nakadawat sila og tawag nga dunay nagkutlo sa kinabuhi sa naasoy nga lugar.

Ang  maong langyaw nakit-an sa caregiver niini nga nagbuy-od sa yuta, wala nay kinabuhi ug dunay samad pinusilan sa wala nga dughan.

Duna say nakitang .38 revolver nga armas duol sa wala nga kamot sa maong langyaw.

"Ang katabang maam, naa man siya sa sulod sa balay, nakadungog siya’g buto sa gawas, mao ‘to iyang nahibaw-an," sigon ni Police Major Alvino Enguito, hepe sa Talamban Police Station 8. Base sa ilang imbestigasyon giingong na-depress kini gumikan sa gihambin nga balatian.

Usa ka suicide note ang gibilin niini ngadto sa iyahang caregiver ug  naghimo sab kini og kaugalingong lungon nga gamiton kun mamatay siya.

Giingong wala'y pamilya ang biktima dinhi ug caregiver lang niini ang iyang kuyog.  IBM BANAT NEWS