PBG. Chinayog : Dili sayun pagsulod sa PNP, ayaw usiki

CEBU, Philippines — Dili usikan ang oportunidad nga nakasulod sa Philippine National Police (PNP) organization, kini maoy pahinumdom sa mga opisyal nga nitambong ug nisaksi sa oathtaking sa mga bag-ong police sa Police Regional Office(PRO)-7.

Ang oathtaking sa mga bag-ong Patrolman ug Patrolwoman Calendar Year 2024 Regular and Attrition Recruitment Program gipahigayon kagahapon sa buntag sa Camp Jesse M. Robredo, Regional Training Center-7 sa Barangay Jugan, Lungsod sa Consolacion. Si Police Brigadier General Constancio Chinayog Jr., Acting Director for Personnel and Records Management ang nagnagsilbing inducting officer sa 600 ka  mga bag-ong polis.

Ang 488 niini mga lalake ug 112 ang mga babaye. Sa mensahe ni Chinayog   nipaabot siya sa iyahang pahalipay tungod sa tanang aplikante sila ang napili, nagpasabot lang kini nga sila maoy pinaka qualified ug angayang mahimong miyembro sa PNP.

Apan iyaha silang gipahinumduman nga ang gisudlan nila nga trabaho kay public service ug mosunod pirmi sa mando sa ilang labaw ug dili malambigit sa bati nga kalihukan ilabi na nga temporaryo pa ang ilang status ug mahimong ma return to unit o kaha ma dismiss kun makahimo og sala.

 Ang Patrolman ug Patrolwoman mag sweldo na og P29,000 wala pay labot sa mga allowances.

Samtang si Police Lieutenant Colonel Janette Rafter, tigpamaba sa Police Regional Office-7 mitataw nga usa sa rason nga dili usikan ang nasugdan sa mga bag-ong Police ang kalisod sa ilang giagian ilabi na sa pag-apply.

 Humana makapanumpa gihatagan og usa ka orasa ang mga bag-ong police nga maestorya ug makagakos ang mga minahal nila sa kinabuhi nga misaksi sa oathtaking sa dili pa sila ipaubos sa unom ka buwan nga training.

Gahilak nga nakig-istorya si Patrolwoman Eva Mae Aba, 24 anyos ug taga Dumaguete sa iyahang mga pag-umangkon kay mingawon siya.  Gipasalig niya sa iyahang mama nga tiwason gyud niya ang training.

Kun mahuman sa unom ka buwan Public Safety Basic Recruitment Course ang maong mga polis ipaubos dayon sila sa Field Training Program. (BANAT NEWS)