Kaslonon natagakan og sanga, patay

CEBU, Philippines — Patay ang driver nga kaslunon samtang kauban niini angol dihang natagakan ang ilahang gisakyang multicab og punoan sa kahoy nga naputol sa may Barangay Ulay, Lungsod sa Vallehermoso, Probinsiya sa Negros Oriental, kagahapon sa buntag.

Ang namatay mao si Jonad Dumas-og, 34, samtang ang naangol nga kauban niini mao si Marciano Dumas-og, 37.  Si Jonas nagpuyo sa Canlaon City samtang si Marciano nagpuyo sa bukirang dapit sa San Carlos City.

Nagkanayon si Police Staff Sergeant Clifford Rotaquio, imbestigador sa Vallehermoso Police Station, gikan ang duha sa Canlaon City apan pag-abot sa Barangay Ulay sa maong lungsod,  giingong dunay nabali nga punoan sa Narra  tungod sa kusog nga hangin.

Walay swerte kay didto gyud kini nahagsa sa ilaha. Ang mas dakodakong sanga didto nahapak sa driver side ug naipit kini nga maoy rason nga dead-on-arrival sa Rural Health Unit Vallehermoso ang biktima.

"Grabe, ang impact padulong gyud sa iyang ulo, siguro pagkaigo sa atop diretso hapak sa iyang ulo, murag napiga gani siya didto," paghulagway pa ni Rotaquio.

Sa pakighinabi sa imbestigador sa pamilya sa mga biktima padulong unta sa bukirang nahin sa Guihulngan City kay magkuha sa gipalit nga luy-a. (BANAT NEWS)