Dalagitang namatay, gilugos?

CEBU, Philippines — Gipalawman sa Oslob Municipal Police Station ang ilang imbestigasyon sa 15-anyos nga dalagita nga nakit-an nga wala nay kinabuhi sa miaging adlaw.

Matud ni Police Major Jude Cebrero, hepe sa Oslob Municipal Police Station nga niadtong December 12 ni-report sa ilaha ang biktima uban ang inahan niini ug misumbong nga matod pa gilugos kini niadtong December 9, 2024.

Atol sa pagsumbong, ang biktima mibutyag ngadto sa kapulisan nga naay niduol matud pa niya nga grupo sa kalalakin-an, gipainom siya ug gidala sa usa ka dapit.

Wala na matud pa makahinumdom ang dalagita sa ubang detalye apan sa dihang nakamata kini  dunay gyud dautang nahitabo kaniya sa iyahang paminaw.  

Apan wala sab dayon makasumbong ang biktima sa iyang mga ginikanan human sa hitabo.

"Upon receiving the information of report PNO Oslob nitabang sa iyaha to recall kung unsa gyud mga nahitabo kay wala man gyud siya nakasulti exactly sa mga uban pang details so gi-assist gyud siya but the victim was hesitant pud siya, dili pud siya motubag sa tanang gipangutana sa iyaha as regards sa iyang gi-alleged nga gi report nga incident sa iyaha," matud ni Cebrero.

Apan niadtong December 13, dunay ni-report sa kapulisan ug nagpahibawo nga namatay ang biktima sulod sa ilang panimalay ug gidala sa district hospital.

Didto sa tambalanan gi-autopsy ang patay'ng lawas sa biktima apan nagpaabot ang kapulisan sa resulta sanglit ang specimen gipadala man sa Camp Crame aron mapahigayonan og histopathological exam intoxicpathological exam.

"As to the kung gilugos gyud siya or daghan gyud ba we cannot ascertain yet as of now kung mao gyud na ang nahitabo, naghuwat pami sa result gyud sa autopsy kay adto rata maka sulti or makaingon nga naa gyuy nahitabo nga ingon ana pagka nailabas na gyud ang autopsy result," pagpasabot ni Cebrero.

Sa pagkakaron wala pay persons of interest ang kapulisan apan naningkamot sila nga mailhan ang mga tawo nga posibleng may kalambigitan sa hitabo kun duna man.

Gi-interview sab nila ang pamilya apil na ang ubang indibidwal nga suod sa biktima ug nangolekta na sab sila og mga CCTV footages nga posibleng makita kun asa gikan ang biktima, kinsa ang kauban niini ug asa nahitabo ang insidente nga giingon sa biktima. (BANAT NEWS)