Pag-ulbo sa tindahan sa pabuto gipasusi

CEBU, Philippines — Nagpadayon pa sa gihimo nilang pakisusi ang kabomberohan ug sa kapolisan sa nahitabong pagbusikad sa tindahan sa mga pabuto sa  Sitio Kapayas, Barangay Canjulao sa Siyudad sa Lapu-Lapu alas 7:35  ang takna sa miaging Miyerkules sa gabii.

Si Police Lieutenant Christian Torres, tigbamaba  sa Lapu-Lapu City Office (LCPO) miingon nga kompleto sa rekisito ug mga giya  ang tag-iya sa maong tindahan sa  mga paboto gikan sa Bureau of Fire Protection.

Naglakip niini ang permit, drum nga gipundohan og tubig, fire extinguishers ug nagbutang usab kini og karatula nga "No Smoking" sign sa iyang tindahan.

Ang dalan sa Barangay Babag ug Canjulao giila kini sa dakbayan nga firecracker zone area diin gidili sa maong dapit ang pagpanigarilyo o pag-testing sa mga gialigya nga mga paboto.

Si Eddie Ymbong nga maoy tag-iya sa mibusikad nga stall sa mga paboto miingon nga sa wala pa ang hitabo dunay duha ka kustomer nga mga lalaki nga nagpalit niini.

Apan paglabay og pipila  ka mga gutlo human nakalakaw ang duha , dunay namatikdang pula nga butang nga nitugpa sa gawas sa ilang tindahan nga nabantayan sa duha niya ka pag-umangkon. Kalit kining mibuto ug diha na nagtakod-takod sa ubang display nga pabuto.

Si Ymbong mibanabana og P24,000 ang danyos sa ilang tindahan, apan bisan pa man niini nagpasalamat gihapon kini tungod kay walay kinabuhing nakalas o naangol  sa maong insidente.

Ang officer in charge sa  Police Regional Office-7 Officer-In-Charge Brigadier General Roy Parena mimando sa Lapu-Lapu City Police Office nga mohimo og imbestigasyon sa hitabo.

Ang PRO-7 nagpahinumdom sa komunidad nga mag-amping kanunay dili magpataka og pabuto bisan asa . (BANAT NEWS)