Nasakpan kay kinawat gibaligya sa online market

CEBU, Philippines — Duha ka mga lalake ang gidakop human namaligya og rectifier batteries nga iya sa usa ka telecommunication company nga ilang gibaligya sa sikat nga online market.

Giingong kinawat diay kini diha sa B. Rodriguez Street, Barangay Capitol Site, siyudad sa Sugbo, Huwebes sa buntag, Disyembre 19, 2024.

Ang mga nadakpan mao sila si alyas Bruce, 30, online seller ug alyas Lindre, ang duha pulos nagpuyo sa Sitio Sto. Niño, Barangay Sabang, dakbayan sa Danao.

Sila si Edward Manaquil Mansing ug Ramil Manlosa nga mga trabahante sa Bantay Kable sa telecommunication company ang nakadakop sa mga suspetsado.

 Na-recover sa kapulisan ang duna ka rectifier batteries nga nagkantidad ang matag usa og P60,000.

Sa impormasyon sa Abellana Police Station 2 Cebu City Police Office nga ang maong telecommunication company na-alarma sa sunod-sunod nga kawat sa ilang rectifier batteries sa kadalanan sa Siyudad ug Probinsya sa Sugbo.

Niadtong Disyembre 19, 2024, duha ka rectifier batteries ang na-post sa marketplace sa Facebook ug gibaligya sa kantidad nga P70,000.

Gituohan nga iya kini sa telecommunication company.  Alas 10 sa buntag niadtong Huwebes usa ka representante sa telecommunication company uban ang duha ka arresting citizens nagkig-meet up sa mga sellers nga mao ang duha ka mga suspek diha sa B. Rodriguez Street, Barangay Capitol Site.

Dihang nag-abot na sila sa lugar nakompirmar nga ang rectifier batteries iya gyud sa telecommunication company ug kini gikawat.

Hinungdan gidakop ang mga suspetsado kay nakalapas sa Anti-Fencing Law of 1979.

Samtang duha ka mga lalake nga giingong nangawat sa sud sa usa ka mall diha sa Mabolo, Cebu City ang nasakpan nga nanguha og chocolates, karsones ug micro cable Huwebes sa gabii, Disyembre 19, 2024.

Unang nadakpan si alyas Glenn, 42 anyos, nagpuyo sa Lower Malibu Bay, Barangay Subangdaku, dakbayan sa Mandaue.  Nanguha matod pa ang suspetsado og usa ka branded nga karsones nga nagkantidad og P2,390.

Apan ang suspect mihimakak gikuha niya maong karsones.

Dayon sunod nga nadakpan mao si alyas Richard, 41 anyos, residente sa Barangay Basak Pardo, siyudad sa Sugbo.  Nanguha matod pa ang suspetsado og nga chocolates nga nagkantidad og P1, 107 ug micro cable nga nibalor og P958.  Dihang gipangutana kun nganong nabuhat niya ang krimen giingong kalisod maoy nagtukmod niya. Matud ang chocolates gawas nga ihatag niya sa iyahang anak ibaligya sab niya kini. Apan iyang giangkon nga magbisyo siya usahay.

Kasong pagpangawat ang ipasaka batok sa duha ka mga suspetsado.  IBM BANAT NEWS