Trak vs motor, 17 anyos nga drayber patay

CEBU, Philippines — Patay ang usa ka 17-anyos nga batan-ong lalake human ang gimanehong motorsiklo nibangga sa dump truck diha sa Sitio Inamoan, Barangay Pangdan, Dakbayan sa Naga, Lunes sa gabii.

Ang nalambigit sa disgrasya mao ang Honda Bravo Motorcycle nga gimaneho sa 17 anyos nga lalake, residente sa Purok Lagundi, Barangay Lutac, City of Naga. Nasuta nga walay driver’s license ang biktima.

Ang dump truck gimaneho ni Larry Jone Balabad, 25 anyos, nagpuyo sa Center Lutopan, Toledo City.

Sa inisyal nga impormasyon sa Naga City Police Station ang motorsiklo gikan sa Proper Naga ug paingon sa Barangay Uling samtang ang dump truck gikan sa Barangay Uling paingon sa Naga City Proper.

Pag-abot sa naasoy nga dapit giingong na-overshoot ang motorsiklo sa pagliko niini ug nibangga sa kasugat nga dump truck sa pikas nga linya.

Gumikan sa kakusog sa pagbangga ang driver sa motorsiklo nakaangkon og grabeng angol sa kalawasan ug gidala sa Vicente Mendiola Medical Center Infirmary Hospital sa City of Naga apan gideklarar kining dead-on-arrival. "It was the motorcycle driver who was party at fault during the incident, thus we cannot file any criminal case sa truck driver, but if dili ma-settle we can assist both parties especially kato sa namatay to file for damages via civil action," pasabot sa hepe sa Naga City Police Station Lieutenant Colonel Verniño Noserale. (BANAT NEWS)