Patay nga babaye gilabay Decemay P. Padilla

CEBU, Philippines — Napalgan kagahapon sa buntag ang patay'ng lawas sa usa ka babaye sa kadagatan duol sa u-turn slot ug opisina sa Bantay Dagat Commission sa South Road Properties (SRP), siyudad sa Sugbo.

Ang babaye nga nakit-an nagsul-ob og color itom nga mga sapot ug gibana-bana nga nag-edad kini og kapin 20 anyos.  Nasayran nga trabahante sa Bantay Dagat Commission ang nakakita sa patay'ng sa lawas sa biktima.

Sigon ni Geoffrey Diola, Operations Head sa Bantay Dagat Commission Cebu City nga sa impormasyon nga gibutyag atong tawo nga nakakita giingong mga alas 4:30 sa kaadlawon dunay sakyanan nga kusog kaayo ang padagan nihunong sa dapit diin nakit-an ang patay'ng lawas, niatras, ninaog ang usa ka tawo ug niabli sa likod sa sakyanan.

Paglabay sa pipila ka segundos giingong nibalik og sakay ang maong tawo ug nipabulhot og dagan sa sakyanan.

Subay niini, si Police Major Efren Diaz Jr., hepe sa Mambaling Police Station 11 nga padayon ang ilahang imbestigasyon sa hitabo.  Sa pagkutlo ning maong balita wala pa gyud nailhan ang biktima sanglit wala pay kabanay o kaha paryente nga niadto sa police station.

Hinungdan nanawagan si Major Diaz sa publiko ilabi na kadtong dunay missing nga miyembro sa pamilya nga moadto sa ilang opisina.

Wala gisalikway sa kapulisan ang posibilidad nga sa laing lugar gihimo ang krimen apan didto lang gilabay sa dapit.  Nagpaabot pa sab sila sa report sa SOCO aron masuta kun dunay mga samad ang biktima.

Apan sa pasiunang paghiling, giingong ang liog niini adunay lama nga gituohang agi sa pagtuok gamit ang mga kamot ug naa sab kini samad sa iyang liog.

Usa sa misusi sa maong dapit ang Maritime Police sanglit apil man kini sa ilang hurisdiksyon.

Subay niini, si Cebu City Police Office Director Colonel Antonietto Cañete miingon nga mag back tracking sila sa mga CCTV nga makatabang sa ilang imbestigasyon.

Gipasalig sab niini sa mga posibleng nakakita sa hitabo nga proteksiyunan sila kun pananglitan mopatim-aw man gani.

"Sa mga witnesses unang-unang we will always observe strict confidentiality of the statement, ikaduha sa kanilang personalities, ikatulon we'll protect them, ikaupat I will subject them to witnessing protection program," ni Cañete pa. (BANAT NEWS)