Rerouting ipatuman tungod sa prosisyon sa Birhen sa Regla

CEBU, Philippines — Gipahibalo sa buhatan sa City Traffic and Management  System (CTMS)  sa Siyudad sa Lapu-Lapu ang  ipatuman nga  rerouting sa mga sakyanan atol sa solemn procession sa kapistahan sa Birhen sa Regla  karong adlawa Nobiyembre 20, 2024 nga magsugod sa alas 4:00 sa hapon.

Ang rota sa solemn procession adto manukad  sa simbahan sa Birhen sa Regla subay sa karsada nga naglibot sa simbahan ug sa public market sa  Barangay Poblacion ug himoon ang pagsira sa  mga dalan nga moagi sa merkado ug sa karaang terminal .

 Nunot niini, giawhag sa  City Traffic Management System nga gipangulohan ni Mario Napule ang mga motorista nga maglikay pag-agi sa mga karsada paingon sa merkado ug sa simbahan aron dili matanggong sa trapiko sa maong mga lugar.

Magbutang og traffic signs ang CTMS aron adunay giya ang mga motorista nga dili mahinayak sa pagsulod sa karsada nga way lutsanan.

Ang mga sakyanan nga gikan sa Lungsod sa Cordova nga moagi sa Barangay Babag paingon sa  1st Mactan-Mandaue bridge o  moagi sa MENZI , dili na makalahos sa Barangay Looc ug kutob ra sa eskina sa   Barangay Gun-ob ug Canjulao ug moliko sa tuo agi sa A. Tumulak St.  paingon sa Lapulapu City District Hospital o Carajay molahos sa S. Osmeña hangtod sa eskina Tamiya dayon moliko sa wala subay sa Maximo Patalinjug Avenue. Samtang ang gikan sa 1st Mactan-Mandaue bridge o gikan sa city hall o Pusok paingon sa Cordova, moagi sa Patalinjug Avenue liko sa tuo sa S. Osmeña St  liko na sab sa tuo sa A. Tumulak St.  unya liko sa Carajay Timpolok Road o  molahus paingon sa eskina Gun-ob ug Canjulao ug moliko paingon sa Cordova o Babag.

Way trabaho ug klase

Temporaryong gisuspenso ni Mayor  Junard  "Ahong"  Chan ang klase  sa mga publikong tulunghaan  sa Siyudad sa Lapu-Lapu apil na ang Lapu-Lapu City College karong adlawa Nobiyembre  20, 2024  nunot usab sa pagsaulog sa piyesta sa Birhen sa Regla, ang patrona  sa siyudad.

Si Chan niluwat og Executive Order nga walay klase ug walay trabaho apan ang mga tulunghaan maoy pabut-on pagpahigayon og klase  sa adlaw nga Sabado isip hulip niini.

Sa  mga pribadong tulunghaan gihatagan sila sa ilang kaugalingong paghukom ang mga nagdumala sa maong mga pribaong tulunghaan

Gawas nga walay klase sa maong E.O.  ni Mayor Chan walay trabaho usab  sa maong adlaw sa pagsaulog sa piyesta.

Apan kadtong front line services apan kinahanglan aduna skeletal forces  nga modawat sa bayad o mga application. Giklaro  sa maong  E. O.  nga walay labot  niini ang mga buhatan sa Emergency Response, Traffic Management,  mga tambalanan ug nadistino sa clean and green program sa kagaamhana

Samtang  higpit usab nga gibantayan sa kapolisan  ang maong adlaw  sa kapistahan batok sa mga dautang elemento nga mobiktima  sa mga mamistahay sa dakbayan

Si Police Lieutenant Colonel Christian Torres, tigpamaba  sa Lapu-Lapu City Police Office (LCPO) miingon nga  miabag  usab sa paghatag og siguridad  sa maong adlaw sa kapistahan ang mga sakop sa Philippine Air Force , Naval Forces,  mga volunteers group ug uban pa. (BANAT NEWS)