PRO-7 motutok sa duha ka kaso sa salvaging

CEBU, Philippines — Padayon pa karon nga gisusi sa kapulisan sa Lungsod sa Balamban ug Talisay City ang duha ka mga patay’ng lawas nga nakit-an nga gituohang gi-salvage.

Unang napalgan ang patay nga lawas sa usa ka lalaki sa may pangpang nga adunay 6metros nga giladmon sa may Barangay Prenza, Lungsod sa Balamban. Nadiskubrehan kini sa mga naglakaw sa dalan tungod sa kabaho ug sa pagsusi nakita ang patay nga lawas.

Matud pa ni Police Lt. Col. Julius Garcia, hepe sa Balamban Police Station nga gitaptapan og packaging tape ang biktima ug nagsugod na kini og kadugta.

Ang maong lalaki kay nagsul-ob og itom nga jacket, itom nga slacks ug gibana-bana ang gitas-on niini anaa sa 5'6 ngadto sa 5'7 ug naa sa 50 anyos ang pangidaron.

Ang maong lalaki giingong gibinaklid kaggapos ug gibaatan usab og packaging tape ang tiil niini. Gituohan nga upat na ka adlaw nga patay ang lawas ug girekomendar na nga ilubong gilayon kini tungod kay peligro na sa panglawas sa mga tawo ang kabaho niini.

Walay nakita nga tattoo ug bugtong nakuha lang sa lawas niini ang duha ka silver nga singsing.

Giwhag ni Garcia ang  mga pamilyang adunay nawala nga kabanay aron matabangan sa pag-ila sa maong napalgan nga patay nga lawas.

Samtang pasado alas-2 sa hapon sa susama nga adlaw Domingo laing patay nga lawas sa usa ka lalaki na usab ang napalgan sa pangpang sa Purok Bamboo, Sitio Campo 5, Barangay Manipis, Talisay City.

Ang maong patay lawas gitaptapan sab og packaging tape sa iyang ulo ug tiil ug gibinakliad usab paghikot sa iyang mga kamot.

Nagsul-ob kini og checkered shorts pants ug sublimation upper t-shirt.

Matud pa ni Police Lt. Col. Epream Paguyod, hepe sa Talisay City Police Station nakig-alayon na sila sa Balamban Police Station aron pagsuta kun konektado ang duha ka mga pagpatay.

Nakita nga parehong walay mga samad agi sa dinunggaban o pinusilan ang duha ka patay’ng lawas.

Kagahapon sa hapon, adlaw nga Lunes, usa ka ginang nga taga Basak-Pardo sa Cebu City ang positibong niila sa lalaking napalgan sa Manipis nga kini mao ang iyang anak nga si Alexander Langi, Alyas Dodo. Tungod niini, hasta ang Inayawan Police Station sa Cebu City nga maoy dunay hurisdiksyon sa Basak-Pardo nakigalayon na sab Talisay ug Balamban Police Stations motabang sa gihimong imbestigasyon. Ang tigpamaba sa Police Regional Office-7, Police Lieutenant Colonel Gerard Ace Pelare gipalawman nila ang imbestigasyon karon.

“We are still conducting investigation niya ang tanang anggulo sa imbestigasyon ang atong i-consider,” ni Pelare pa. (BANAT NEWS)