Delegado sa Palarong Pambansa nangabot

CEBU, Philippines — Hinay hinay na nga nangabot ang delegado sa Palarong Pambansa dinhi sa dakbayan sa Sugbo.

Ang delegado gikan sa Davao Region naa na gipahiluna sa Don Carlos A. Gothong Memorial National High School sa dakbayan sa Sugbo ug miabot na usab ang delegado gikan sa Cagayan Valley.

Samtang gipaabot nga mahimo na nga ma download ang Palarong Pambansa App karong Biyernes Hulyo 5, 2024

Ang Palarong Pambansa App gipresentar nila ni Aboitiz Power Distribution Group Chief Operating Officer Anton Mari Perdices ug Cebu City Sports Commission Chairman John Pages.

Nasayran ang maong app gitanyag ni Perdices kang Pages, isip ilang suporta ngadto sa kagamhanan sa siyudad sa Sugbo.

Ang arm sa Aboitiz nga UBX Philippines Development pinaagi sa Chief Executive Officer nga si John Janusexczak uban sa abag ni Max Limpag ang Technology Blogger maoy ilang katambayayong sa paghimo sa app.

Pinaagi niini masayran ang kalambuan sa mga kalihukan sa Palaro ug uban pa.

Si acting Cebu City mayor mayor Raymond Alvin Garcia mapasalamaton niini tungod kay ang maong app dako ug ikatabang sa siyudad dili lang sa Palarong Pambansa apan sa uban pa unya nga mga programa ug serbisyo.

Gisubay na usab sa Cebu City Police Office(CCPO) pinangulohan sa ilang City Director Colonel Ireneo Dalogdog uban ang mga opisyales sa Department of Education Cebu City Division niadtong Martes ang rota alang sa pagbukas sa Palarong Pambansa 2024 karong Hulyo 9, 2024, Martes.

Magsugod ang rota sa dalan Osmeña Boulevard habig sa Department of Health Central Visayas paingon sa Cebu City Sports Center.

Nagkanayon si Police Lieutenant Colonel Janette Rafter, Deputy City Director for Administration sa CCPO nga gipanglantawan nila ang paghuot sa dagan sa trapiko sa pagbukas sa Palaro.

Dunay himoong rerouting sa pipila sa mga sakyanan aron paghatag og dalan sa kalihukan.

Hinungdan nga nanawagan si Lt. Col. Rafter sa publiko ilabi na sa mga sumasakay nga patas-an ilang pasensiya ug sabton ang sitwasyon.

Dul-an duha ka libo ka mga police ang ipakatap sa Palarong Pambansa 2024 ug wala nay mga police personnel sa siyudad ang gitugutan nga maka-leave sa trabaho.

Nasayran nga kapin sa dos mil na ka mga contingents gikan sa nagkalain-laing rehiyon sa Pilipinas ang niabot na sa Sugbo isip advance party aron mapahimutang ang mga atleta sa ilang mga billeting areas.

Si Col. Dalogdog misusi sab sa 20 ka mga billeting areas aron masiguro nga luwas ang mga atleta uban ilang mga coaches. — Gie-Ann N. Tapic, Decemay P. Padilla (BANAT NEWS)