48 anyos nga ginang nakuhaan og P7.1 milyon shabu

CEBU, Philippines — Gumikan kay wala'y sweldo nga madawat gikan sa simbahan nga iyahang gialagaran isip volunteer ug dili siya kapalit sa panginahanglanon sa iyang pamilya, nipahawa kini ug namaligya nalang matud pa og illegal nga drugas.

Apan naundang ang illegal nga kalihukan sa 48- anyos nga suspek kay nadakpan kini sa mga operatiba sa Waterfront Police Station 3 pinangulohan ni Police Major John Lynbert Yango sa buy-bust operation sa Sitio Lumboy, Barangay San Roque, Cebu City kagahapon sa alas 3 sa kaadlawon.

Nasakmitan ang suspetsado og 1,050 grams nga shabu nga nagkantidad og P7.1 million.

Matud ni Police Major John Lynnert Yango, hepe sa Waterfront Police Station 3 nga tulo ka semana nilang gipanid-an ang suspetsado sukad dunay nakahatag kanila og impormasyon nga namaligya kini og ilegal nga drugas.

Usa ka high value individual nga babayeng ilang nadakpan niadtong Hunyo 17 nga nakuhaan og usa ka kilong shabu maoy nihatag og impormasyon bahin sa maong ginang.  "Base lang sa atong pagsubay kinsa tong mga links sa mga previous arrested naa ni iyahang ngalan, usa ni siya sa high value individuals nga naglihok diri sa Cebu, involved aning drugs," matod ni Yango.

Ang suspetsado maka dispose matod pa og usa ka kilo nga shabu kada duha ka semana dili lang Cebu City kondili apil na ang mga silingang siyudad.

Niadtong 2016 napriso na kining suspek tungod gihapon sa illegal nga drugas ug nakagawas niadtong December 2021.  Giingong didto sila nagkaila niadtong babayeng unang nadakpan niadtong Hunyo 17.

Si Cebu City Police Office Director Colonel Ireneo Dalogdog miingon nga ang tinubdan sa drugas sa suspetsado gikan kang alyas Pidoy nga napriso karon sa prisuhan sa Abuyog Leyte.

Sa pikas bahin, nasikop sa buy-bust operation sa mga tinugyanan sa National Bureau of Investigation-Central Visayas Regional Office sa Barangay Barangay Lahug ning Dakbayan sa Sugbo ang usa ka Charlie Bauntad.

Ang NBI-CEVRO nakadawat ug kasayuran may kalabutan sa illegal nga kalihukan sa maong dinakpan duol sa Camp Lapu-Lapu sa Visayas Command.

Ang NBI-CEVRO nagpahigayon og surveillance lakip ang test buy sa maong suspetsado aron sa pagsuta sa information nga ilang nadawat.

Dihang nakumpirmar ang report gilusad dayon ang operasyon hinungdan sa pagkasikop kaniya ug nakuhaan og walo ka putos nga gidudahang shabu ug P500 nga buy-bust money.—Decemay Padilla ug IBM BANAT NEWS