Masyador sa buwangan gipusil patay
CEBU, Philippines — Patay ang usa lalaki nga gikan sa buwangan human kini pusila sa wala mailhing kriminal niadtong Domingo sa hapon diha sa Sitio Ilag, Barangay Cantabaco, Dakbayan sa Toledo.
Usa ka drayber sa habal-habal ang nitaho sa kapolisan kabahin sa usa ka patay nga napalgan diha sa nahisgutang lugar.
Base sa imbestigasyon sa kapolisan ang biktima giila nga si Jolito Pacaña Iwayan alias “Chokloy”, 35-anyos, minyo, masyador sa buwangan, residente sa Sitio Bawod, Barangay Magdugo sa nahisgutang siyudad.
Ang biktima giingong gikan kini sa buwangan sakay sa iyang motorsiklo padulong na unta nga mopauli apan pag-abot diha sa lugar nga nahitaboan gipusil kini sa wala mailhing mamuno.
Na-recover sa Scene of the Crime Operation gikan sa lugar nga nahitaboan ang usa ka kabhang sa bala sa kalibre .45 nga pistola ug P7,500 nga kwarta.
Ang kapolisan sa siyudad nagpahigayon og follow-up nga imbestigasyon sa pagpiho sa hinungdan sa maong pagpamusil ug pag-ila sa kriminal.
Gikataho nga ang biktima gikatakda unta kining motambong kagahapon sa hearing sa kasong direct assault batok sa iyang silingan ngadto sa korte. — Irish L. Laborte (BANAT NEWS)
- Latest
