Babaye nakuhaag P10 milyon shabu

CEBU, Philippines — Mokabat og P10.2 milyones ang balor sa giingong shabu nga motimbang og 1.5 kilo ang nasakmit atol sa buybust operation nga gipahigayon sa Drug Enforcement Unit sa Talisay City Police Station sa Yongco Compound, Brgy. Bulacao, Talisay City, Cebu alas 12:48 kagahapon Biyernes sa kaadlawon.

Ang dinakpan giila nga si Annabel Cabellon Cabriana alyas Kolot, 22, adunay kapuyo ug residente sa Sitio Hawod, Brgy. Bulacao, Talisay City. Matud pa sa otoridad ang maong dinakpan nagsugod sa iyang negosyo sa ilegal nga drugas sukad niadtong 2022. Nagsugod siya isip small time player ug human makuha ang pagsalig sa iyang supplier, gitugyanan siya sa paghupot og mga kinilo nga shabu.

Giingong maka-dispose og shabu hangtod sa duha (2) ka kilo matag semana ang suspek ug sagad sa iyang gisuplayan naa sa Brgy. Bulacao, Candulawan, Tabunok, Lagtang, San Isidro sa Talisay City, ug pipila ka dapit sa Cebu City.

Dugang pa ang subject gipaubos sa monitoring sulod sa usa ka semana human makadawat og report gikan sa confidential informant nga nalambigit siya sa dakong negosyo sa ilegal nga drugas.

Human nakakuha og igong impormasyon ang mga operatiba sa DEU sa Talisay CPS gihimo dayon ang buy-bust operation nga miresulta sa pagkasikop niini.

Atol sa buybust Operation nakompiskar gikan sa posisyon sa dinakpan ang 15 ka dagkong putos nga tag 100 gramos nga mo timbang og 1.5 kilos nga gisulod sa shoulder bag nga color blue ug buybust money.

Ang dinakpan kasamtangan gibalhog sa Custodial Facility sa Talisay City Police Station pasakaan og kasong kalapasan sa Sec.5 og Sec.11 Art ll RA 9165.— Gabriel Bonjoc, IBM BANAT NEWS