Iro nitaba'g luwas sa masuso

CEBU, Philippines — Giisip sa “hero dog” sa mga tawo diha sa kabalayang nadat-ugan sa nahugno nga riprap sa Barangay San Jose, ang asong Pinoy o Aspin nga si Chingching kay tungod niya daling natultolan sa mga responders kun asa ang managinahang Claire Dosdos u gang unom pa ka buwan niining masuso atol sa insidente niadtong adlaw nga Domingo.Matud pa sa mga barangay workers nga nakahinabi sa Banat News diha sa lugar kagahapon, napalgan si Dosdos ug ang iyang anak tungod sa iro nga si Chingching.

Si Chingching naapil sa natabunan kauban sa manag-inahang agalon apan tungod sa pagsige niini og kisikisi ug paghot natultolan ang ilang nahimutangan hangtud nga naugkat ang manag-inahan apan patay na ang ginang. Matud pa sa kapuyo nga si Adonis Otero, dihang ilang naugkat ang duha gitabunan sa lawas sa iyang kapuyo nga si Claire ang unom pa ka buwan nilang anak kinsa milagrong wala ra maunsa, samtang luwas sab ang kinamaguwangan nilang anak nga unom pa ka tuig.

Apan nabali na ang bukton ug hawak ni Claire ,patay na kini pagabot sa tambalanan. Samtang ang iro nga Chingching naangol sab ug nagtakiang. Apan wala na kini mopahawa sa dapit diin sila natabunan sa manag-inahan gikan pa sa pagkahitabo maong diha lang siya gipakaon ug gipainom og tubig sa mga tawo.

Si Otero nihangyo karon sa tag-iya sa riprap  nga tabangan sila niini. Natabang ang duha nila ka bata apan si Claire patay na tungod kay nabalian kini og bukton ug hawak.  Si acting Mayor Raymond Alvin Garcia kinsa nibisita sa mga nakalas aron pagtunol sa iyang personal nga hinabang  mimando sa pagpahigayon og imbestigasyon kung adunay mapasakaan og kaso sa maong duha ka insidente.

Sa wala pa miduaw sa San Jose, niadto sab si Garcia sa haya sa 17-anyos sab nga babayeng nakalas sa Barangay Tisa sa samang adlaw tungod gihapon sa riprap nga nahagsa sa ilang balay sayo sa kaadlawon niadtong Domingo. — Dale G. Israel, Rowena Capistrano (BANAT NEWS)