Duha ka delegado sa Palaro na-dengue

CEBU, Philippines — Duha ka delegado sa Palarong Pambansa ang nalandig sa Cebu City Medical Center tungod kay giingong nagpositibo sa dengue.

Kini ang gibutyag ni Dr. Peter Mancao, hepe sa Cebu City Medical Center.

Matud ni Mancao nga ang maong duha ka delegado aduna nay gipamati sa ilang panglawas gikan pa sa ilang dapit diin ang usa niini feverish na sa pag-abot sa Sugbo.

Hinuon ang mga nahisgutang delegado stable ra kini ug padayon lang gi-monitor ang kahimtang sa ilang panglawas.

Si Mancao nagkanayon nga kong dili pa maayo ang mga player sa ilang gipamati ug kinahanglan pa kini magpabilin sa tambalanan dili kini nila hatagan og clearance nga makaduwa sa Palarong Pambansa.

Si Acting Cebu City Mayor Raymond Alvin Garcia nagkanayon nga andam ug preparado kaayo ang Cebu City Medical Center ug Vicente Sotto Memorial Medical Center alang sa mga delegado sa Palarong Pambansa 2024.

Matud ni Garcia nga adunay mga gitagana nga fast lane alang sa mga apil sa Palarong Pambansa nga nagkinahanglan og dinalian nga pag-atiman.

Nasayran nga adunay mga pribado nga tambalanan nga katambayayong sa kagamhanan sa Siyudad sa Sugbo nga mohatag og dinalian usab nga pag-atiman sa mga apil sa maong dakong kalihokan sa paugnat sa kusog.

Si Department of Education (DepEd) Assistant Secretary Francis Cesar Bringas kinsa  secretary general Palarong Pambansa nibutyag nga nakig-alayon na sila karon sa local nga authority sa panglawas kong ang maong sakit nga nakuha sa mga atleta gikan ba sa dapit nga ilang gigikanan ug dinhi lang nag-manifest sa Cebu City.

Dugang ni Bringas nga nag-request na usab sila sa health authority sa pagpahigayon og fogging sa billeting area nga adunay nataptan og dengue. (BANAT NEWS)