Namusil sa polis, napatay

CEBU, Philippines — Napusilan patay sa kapulisan sa Lungsod sa Compostela ang usa ka 34-anyos kay inay mopatuo sa pagbadlong kaniya, giingong gipabuthan na hinuon niini ang mga pulis nga niresponde sa alarma diha sa Barangay Panangban pasado alas-7 sa gabii adlaw'ng Miyerkules, Hulyo 3, 2024.

Ang napusilan patay mao si Joel Niño Castro Pareja, 34-anyos, residente sa Purok Kamansi, Brgy. Panangban, Compostela.

 Matud ni Police Captain Lino Tryss Galvan, hepe sa Compostela Police Station nga dunay nitawag kanila bahin sa tawong nagpasalba diha sa gymnasium maong girespondehan dayon nila kini.

Giimbestigar pa nila kung unsay rason nganong nagpasalba og armas ang maong lalaki, kay sa ilang pagpangutana wala man kini nakainom.

Gibadlong pa kini sa barangay kapitan apan gikatahong gihagit hinuon niya sila nga magpadala og polis maong nanawag sila sa police station.

Pag-abot sa kapulisan sa Barangay Hall sa Panangban giingong naa pa didto ang suspek nag-atang.

Giestoryahan kini sa mga polis apil na ang amigo niini aron kini alam-alaman apan wala kini mopatuo.

Samtang nagpadyaon ang negosasyon giingong kalitb niining gipabuthan ang mga polis gamit ang kalibre .38 nga revolver ug naigo ang side mirror sa patrol car.

Dihadiha napugos sa pagbawos og pabuto ang kapulisan ug naigo ang suspek sa kuto-kuto.

"Naka retaliate atong police personnel hinungdan na neutralize and then mao to nanawag og DRMO nato para matabang pa siya kay during atong na neutralize na nakita nato nga gahinga pa na pin down lang siya pag-abot sa attending physician nato na declare siya dead on the spot," ni Galvan pa.

Nasayran usa ka drug surrenderee kini ug gani kagahapong adlawa unta gikatakda kining ipa rehabilitate sa iyang mga kabanay. —Yves Mae Salinas (BANAT NEWS)