Glass installer nangawat og P1.1 milyon nga wires kay wa nay konsumo

CEBU, Philippines — Natanggong sa kapulisan sa Mabolo Police Station ang usa ka lalaki human nasakpan sa gwardiya nga nangawat og electrical stranded wires sa kumpanya nga iyahang gitrabahuan diha sa Barangay Mabolo pasado alas 7 sa gabii, Hulyo 4. Ang 36 anyos nga suspek usa ka glass installer sa kumpanya ug kasamtangang molupyo sa Barangay Basak ning dakbayan sa Sugbo.

Nasikop kini pinaagi sa Citizens Arrest (CITAR) human mabantayi sa gwardiya nga nangawat kini’g electrical wire.

Nasakmit kaniya ang maong kable nga adunay gitas-on nga 35 ka metros o 5 millimeters nga mokabat ngadto sa P1.1 milyones.

Gidala kini sa estasyonan sa polis ug naghuwat na lang sa kumpanya kun mopasaka ba sila’g kaso.

Miangkon kining suspek nga nabuhat niya ning pagpangawat tungod wala na kini pangkonsumo ug magpada pa kini’g kwarta sa iyahang inahan nga tua sa Leyte.--Irish L. Laborte ug John Mark P. Dejito, CNU ug PIT Interns/IBM