Awto gibangaan og baka
CEBU, Philippines — Maayong pagkapiyapi ug naguba ang kilid sa atubangang parte sa usa ka awto human matud pa gibanggaan og usa nati nga baka diha sa Barangay Dalingding Sur, lungsod sa Medellin, Cebu, Miyerkules sa buntag, Hunyo 26, 2024.
Giila ang tag-iya sa sakyanan nga si Ethel Paelnar, 40, kawani sa Medellin Municipal Trial Court ug taga Daanbantayan.
Samtang giila usab ang tag-iya sa baka nga si Preish Faith Lingaro, 26, residente sa nahitaboan.
Base sa imbestigasyon sa Medellin Police Station, padulong si Paelnar sa Medellin proper aron pagtambong sa trabaho dihang matud pa kalit nga nibangga sa iyang sakyanan ang baka. Nasuta nga ang baka upat palang ka bulan ug nagsunod-sunod sa inahan niini sa dihang nahitabo ang aksidente.
“Ming tuyok ang baka maoy ming dam-ag, nagsunod sila (inahan sa baka) human mibalik sa agi ang gamay (baka), so maoy mibangga. Kay ang igo sir naa sa left side,” matud pa sa polis nga nakahinabi sa Banat News.
Hinuon wala ra maunsa ang sakay sa awto ug nagaras lang sab ang baka. Nagkasabot ra ang duha ka habig nga kalimtan nalang ang nahitabo. — John Mark Dejito PIT-Intern/IBM
- Latest
