Yangungo sa Cebuano filmmakers paminawon na kaha karon?

CEBU, Philippines — Nanawagan si Cebu City Councilor James Cuenco sa nagmugna sa ordinasa nga Cebuano Cinema Development Council (CCDC) nga ipatuman na kini aron masuportahan ang Cebuano filmmakers nga makahimo og historical ug cultural heritage sa dakbayan.

Kini human mitiyabaw ang convenor nga si Marlon Hofer tungod sa kakuwang sa suporta nga ilang nadawat gikan sa city hall bisan pa man sa giaprubahan nga ordinansa, 10 ka tuig na ang milabay.

Matud ni Cuenco, dugay na niyang gihangyo ang mga nanglabay nga mga administrasyon sa pagpatuman sa ordinansa alang sa sektor sa Cebuano nga cinema apan wa kini matagad.

“It is a pity that our vast reservoir of Cebuano talents are not afforded the opportunity to showcase our rich Cebuano heritage and culture. I am hopeful that during the Garcia administration, this ordinance will be implemented more vigorously,” matud ni Cueno pinaagi sa text message sa The Freeman gahapon.

Dugang ni Cuenco, iyang paningkamotan na malakip ang pagpundo sa CCDC sa 2025 Annual  Investment Plan (AIP) apan kinahanglang mosumitir ang grupo og detalyadong budget plan.

Ang maong ordinansa giaprubahan 10 ka tuig ang milabay ug si Hofer ang mibarog isip convenor. Matud ni Hofer, iyang personal nga adbokasiya ang pagpundok sa mga lokal nga film makers sa Cebu aron makakuha sab sa suporta nga ilang gikinahanglan.

Dugang ni Hofer, wa matagad ang ordinansa sa panahon ni kanhi Mayor Tomas Osmeña apan nakakuha sila og paglaom sa paglingkod ni kanhi Mayor Edgardo Labella apan nagka-pandemiya nasakit ug nitaliwan kini.

Misaysay si Hofer, kapin 1,000 na ka youth graduates ang natagaan nila og libre nga workshop bisan wa silay budget nga nakuha gikan sa city government.

Nabuhian sila og paglaom n sa pag-asumir ni acting Cebu City Mayor Raymond Alvin Garcia. Dugang ni Hofer, kanunay ang ilang koordinasyon sa Film Development Council of the Philippines (FDCP) aron malakip sila sa mga proposals apan wa sila matagad sa nanglabay nga duha ka administrasyon sa dakbayan.

"Tanan nga mga probinsya duna nay  Cinematheque, except Cebu City where filmmaking actually started," saysay ni Hofer. —/IBM (BANAT NEWS)