16-anyos namaligya og shabu nadakpan

CEBU, Philippines — Na-rescue sa kapulisan sa Carbon Police Station sa Cebu City Police Office ang usa ka Grade 9 student atol sa ilang buy-bust operation diha sa Sitio Bato, Barangay Ermita, dakbayan sa Sugbo, pasado alas-11 sa gabii niadtong Miyerkules, Mayo 22, 2024.

Ang maong Grade 9 student nag-edad og 16 anyos nga residente ra usab sa naasoy nga lugar.  Nakuhaan kini og .8 grams sa gituohang shabu nga nagkantidad og P5,440.

Matud ni Police Lieutenant Colonel Janette Rafter, Deputy City Director for Administration sa Cebu City Police Office(CCPO) nga na-contact na sa Women and Children Protection Desk (WCPD) sa Carbon Police Station ang ginikanan sa bata ug gipangayoan na sab kini og birth certificate aron masuta gyud ang edad niini.

"Alleged na nila (16-anyos) so, ang kanang sa discernment if kanang bataa or kanang menor de edad is really a minor that is the time nga kinahanglan nato og discernment for the filing of appropriate case kay more than 15 years old naman siya but again sa side sa police we will have to file the appropriate case kay until such time wala siya'y birth certificate mao gani ‘to among gihangyo ang ginikanan para padala sa atong kapulisan ang birth certificate to ensure kung pila gyud iyang edad and then mapa psychological examine nato sa atong DSWD for the issuance whether the minor minor has acted with discernment or not," matud ni Rafter.

Gisuta pa sa kapulisan kun ang drugas nga nakuha gikan sa na-rescue sa maong batan-on iya ba.

"This is a buy-bust operation so there must be prior information...once mo undergo ta og buy-bust operation there should be prior nga mga surveillance," ni Rafter pa.

Sa laing operasyon, 50 gramo nga gituohang shabu nga nagkantidad og P340 mil ang nasakmit  gikan High Value Individual (HVI) nga pusher nga nadakpan sa joint buy bust operation sa mga sakop sa City Drug Enforcement Unit (CDEU) ug City Intelligence Unit (CIU) sa Lapu-Lapu City Police Ofiice  (LCPO) alas 6 pasado ang takna sa Miyerkules sa gabii sa Barangay Pusok sa maong dakbayan

Si Police Colonel Ali Baron, Officer -In-Charge (OIC) director sa LCPO miila sa nadakpan nga mao ang 35 anyos nga  lalaki taga Purok  Sambag  sa Barangay Canjulao sa maong siyudad.

Ang maong dinakpan maoy matud pa tigtagak og shabu sa maong lugar.

Laing HVI sab ang nadakpan sa buy bust operation sa Barangay Tilhaong, Lungsod sa Consolacion alas 5 pasado ang takna sa miaging hapon. Si Police Lieutenant Colonel Ruel Barlat, hepe sa Consolacion Police Station miingon nga ang dinakpan 38 anyos nga nagpuyo usab sa maong dapit

Nakuha gikan sa maong dinakpan ang 40 gramo nga shabu nga nagkantidad og P272 mil ug P500 nga buy bust money.—  IBM BANAT NEWS