Libreng tuli gipahigayon sa siyudad sa Mandaue

CEBU, Philippines — Gisugdan niadtong Sabado Hunyo 15, 2024 ang "Operation Tuli sa kabataan sa kabarangayan sa siyudad sa Mandaue.

Gipahigayon ang libreng tuli diha sa Cabancalan National High School diin kapin sa 200 ka bata ang nagpatuli nga nagpanuigon og 7 ngadto sa 10 anyos.

Lakip sa gihatag nga serbisyo sa mga doktor mao ang complimentary medical wellness ingon man surgical consultations sa lain-laing balatian nga naglakip sa thyroid i, hernias, ug cysts.

Gidawat usab ang mga walk-ins nga nagtinguha sa pagpa-check-up ug mopahimulos sa gipasiugdahan nga libreng tuli.

Ang maong kalihukan gipasiugdahan sa Rotaract Club Cebu 3rd District nga nakig-alayon sa kagamhanan sa siyudad sa Mandaue ug Office of the Vice President, uban sa nagkadaiyang private companies.

Ang OVP sumala pa nigahin og P3 miyones alang sa medical assistance ngadto sa beneficiaries nga naglakip sa 27 ka wheelchairs, alang usab sa 27 ka barangay sa dakbayan. (BANAT NEWS)