DOH: Top 3 nga sakit panahon sa tinguwan

CEBU, Philippines — Nagsige na og bunok ang uwan matag karon og unya dinhi sa Kabisay-an ug bisan asang dapit sa nasud ug gipaabot nga masinati gyud kining mga pagbaha ug pagdaghan sa mga mapundong tubig nga posibleng mamahimong tinubdan sa mga sakit para sa mga tawo.

Tungod niini, mipahimangno si Health Secretary Teodoro Herbosa sa publiko nga mag-amping karong panahona tungod kay sa panahon sa tinguwan kusog ang mga kaso sa dengue, cholera ug leptospirosis.

Matud niya mao kini ang gikonsiderar sa DOH nga top 3 illnesses panahon sa tinguwan.

Sumala pa sa report, si Herbosa  miingon nga ilang gitan-aw nga posibleng mosaka ang mga kaso sa dengue tungod aning tinguwan ilabi na modaghan ang mga lim-aw-lim-aw sa mga tubig bisan asa tungod sa uwan.

"If you store rain water in containers, make sure you will cover it properly because mosquitos will lay eggs in clean water. We should prevent the spread of mosquito to prevent dengue," pasidaan pa ni Herbosa.

Samtang gawas sa dengue, ang mga sakit nga cholera ug leptospirosis parehong makuha gikan sa kontaminadong tubig.

Matud niya, ang cholera sagad makuha gikan sa mga kontaminadong atabay o mga tinubdan sa tubig nga imnon sa mga tawo.

" Toilets should be 25 meters away from water sources to prevent fecal contamination. We should strictly observed proper sanitation and hygiene," puno pa niya.

Samtang ang leptospirosis makuha gikan sa ihi sa mga ilaga.

"Our solid waste and garbage are increasing and it will be a good shelter for rodents population if not properly dumped. Leptospirosis is deadly and it's usually carried due to floods,"  sumala pang Herbosa.Gikan sa Philippine Star News Service/IB