AFP andam motabang sa seguridad

CEBU, Philippines — Motabang ang militar ngadto sa kapolisan sa Dakbayan sa Talisay sa pagpatuman sa kahapsay ug kalinaw sa siyudad.

Kini maoy gibutyag ni Mayor Gerald Anthony Samsam Gullas kabahin sa pagbisita sa iyang buhatan sa 14th Civil Military Operations Katipanan Batallion pinangulohan ni 1st Lt. Joy Selidio.

Matud pa niya nga ang ilang grupo maoy gidestino sa habagatang bahin sa probinsya u gang uban niini diha sa maong siyudad gibutang.

Nagkanayon si Gullas nga pwedeng motabang ang militar sa Talisay ilabi na sa pagpatuman sa kalinaw.

Nagpasalamat si Gullas nga gipili sa 14th CMO Battalion ang Talisay aron adunay kaabag ang kapolisan pinangulohan ni Police Lt. Col. Epream Paguyod.

Si Konsehal Gail Restauro, chairman sa committee on peace and order niingon nga dili sa ingon nga kay dunay militar sa siyudad aduna na dayun hulga sa rebelde.

Iyang gipasabot nga ang presensya sa militar mao lang ang pagtabang sa kapolisan.

Nasayran nga dili lamang ang Talisay City ang gibisita sa AFP sanglit si  AFP Commander Joel Benedict Batara sa Visayan Command  mibisita sab sa buhatan ni Mayor Jonas Cortes sa Mandaue City niadtong miaging adlaw.  Si Batara gikatahong mibutyag nga andam silang motabang sa pagsiguro sa kahapsay ug kalinaw sa siyudad, kaabag sa kapolisan para sa seguridad sa mga Mandauehanon.

Si Cortes nalipay sa kaandam sa AFP pagtampo para sa kalinaw sa siyudad. (BANAT NEWS)