15 ka nag-edad og 90 anyos sa Talisay nakadawat og cash aid
CEBU, Philippines — Moabot sa 15 ka Talisaynon nga nag edad og 90 anyos ang nakadawat og pinansyal nga ayuda gikan sa kagamhanan sa Dakbayan sa Talisay.
Si Talisay City mayor Gerald Anthony “Samsam” Gullas maoy nangulo sa pag apud-apod sa tag P20mil ka pesos nga ayuda.
Ang kagamhanan sa Talisay nagsugod niini nga programa human napasar sa konseho ang ordinansa nga inay ang nagpangidaron lang og 100 anyos ang makadawat og P100mil ka pesos ila kining gibahin.
Sa nag edad og 90 anyos modawat na kini sa P20mil unya kung moabot nasab sa pangidaron sa 95 ang Talisaynon modawat nasab siya og P30mil ka pesos.
Kung moabot pa gyud kini sa 100 ang pangidaron iya sab nga madawat ang sobra nga P50mil ka pesos.
Matud pa ni Gullas nga daghang panginahanglanon sa panglawas ang mga edaran busa mas maayo nga sayo nila nga mapahimuslan ang ayuda sa Dakbayan.
Kini ilabi na sa ilang pagpalit sa ilang maintenance nga tambal para sa ilang gihambin nga balatian.
Suma pa ni Gullas nga makalipay nga magtan-aw nga baskog pa ang katiguwangan nga iyang nahimamat. (BANAT NEWS)
- Latest
