Nagduwa sa kinatawo diha sa food court sa mall gipangita

CEBU, Philippines — Nag-viral sa social media ang video sa usa ka hamtong nga lalaki nga nagduwa sa iyahang kinatawo samtang anaa sa food court sa usa ka mall diha sa Natalio Bacalso Avenue, Siyudad sa Sugbo niadtong Martes sa hapon.

Ang maong video kuha kini sa usa sa mga tinun-an nga nisuroy sa maong mall ug nakakita sa bastos nga binuhatan sa maong lalaki.  Nasayran nga ang nahisgutang tinun-an uban sa iyahang mga classmates nga nagpa-clearance ug dihang gibati og kagutom niadto sila sa mall aron mangaon.

Ug samtang nakalingkod sila nabantyan niini ang lalaki nga anaa sa atbang naglingkod ug giingong nagsige og tan-aw sa tinun-an.

Ang maong lalaki kinsa naghawid og cellphone padayon nga nagtutok sa tinun-an ug nakurat nalang ang mga tinun-an tungod kay nagduwa kini sa iyang kinatawo.

Ang tinun-an nikuha kini sa iyang cellphone ug gi-video ang gihimo sa lalaki ug dihang nakauli na kini nitug-an niya sa iyang amahan ang hitabo.

Ang amahan sa tinun-an ang nag-upload sa video diha sa Facebook page niini nga niani dayon og daghang shares ug likes.

Ang maong hitabo nakaabot sa hepe sa Carbon Police Station Police Major Philip Libres kinsa nagkanayon nga ang maong hitabo wala ma-blotter sa police station ug nasayod nalang sila pinaagi sa mga tigbalita.

Matud ni Libres nga gisubay na nila kong kinsa kadtong maong lalaki nga naghimo og bastos nga buhat sa mall.

Nakig-alayon sila dili lang sa nag-upload sa video apil na sa mga kadagkoan sa mall aron makakuha og dugang ebidensiya sama sa footage sa closed circuit television (CCTV) aron mailhan ang maong lalaki.

Kasong unjust vexation ug kalapasan sa Safe Spaces Act ang atubangon sa maong lalaki nga nagbinastos.

Nanawagan ang kapolisan sa publiko ilabi na sa nakaila sa maong lalaki nga mo-report sa ilahang buhatan aron makuha ang kompletong ngalan ug address niini aron mahatagan dayon og aksiyon ang nahimo niining kalapasan. (BANAT NEWS)