Suspek sa pagpamusil, gun for hire sikop

CEBU, Philippines — Nadakpan sa kapolisan sa Mambaling Police Station ang suspetsado sa nahitabong pagpamusil sa Avocado Street, Barangay Mambaling, Siyudad sa Sugbo niadtong Mayo 20, 2024.

Ang suspetsado mao si Ramil Ortega, 43-anyos ug ang biktima mao si Chester Jian Savellon kinsa naigo sa iyang ulo, ubos nga bahin sa dunggan ug likod sa bat-ang ug gikatakda kining ipaubos sa operasyon.

Si Ortega nadakpan pinaagi sa hot pursuit operation sa kapolisan sa Mambaling Police Station diha sa Sitio Manga, Barangay Punta Princesa niining siyudad ug nakuhaan kini og kalibre .38 nga revolver.

Nakompirmar sa kapolisan nga ang suspek mao ang responsable sa krimen tungod kay dihang nagpahigayon sila og hot pursuit human naarlamahan ang nahitabong pagpamusil aduna sila'y mga nakuhang witness ug gipakita nila ang hulagway sa suspek ug gikompirma sa mga nakakita sa hitabo.

Giadto usab sa kapolisan ang usa sa mga kauban sa suspek sa compound nga iyang gipuy-ay ug nikompirmar nga si Ortega ang giingong namusil sa biktima.

Nasayran nga sa wala pa nahitabo ang pagpamusil gikan sa compound giingong gibalhin na sa suspek ang iyang pamilya kay giingong adunay hulga.

Nasuta sa imbestigasyon sa kapolisan nga personal nga kasuko sa usa’g-usa ang hinungdan sa insidente.

Sa laing bahin, nadakpan sa kapolisan sa Dakbayan sa Talisay ang usa ka armadong lalaki diha sa Sitio Manguilamon, Barangay Jaclupan sa nahisgutang siyudad niadtong Martes sa gabii.

Ang nasikop giila lang sa pangalan nga “Jessie”, 44-anyos, nagpuyo sa nahisgutang lugar.

Ang kapolisan nagpahigayon og balidasyon sa taho nga ilang nadawat kabahin sa armadong lalaki. Sa pagsulod sa kapolisan sa dapit ilang nakita ang suspek nga kadudahan og lihok ug nasigpatan nga adunay armas.

Hinuon wala mosukol sa kapolisan ang suspetsado ug boluntaryong nitahan sa iyang usa kalibre .45 nga sub-machine gun nga adunay duha ka magazine ug 12 ka buhing bala; usa ka silencer; usa ka kalibre .45 nga pistola nga adunay magazine nga adunay upat ka buhing bala ug shabu.

Si Police Lieutenant Colonel Epraem Paguyod, hepe sa kapolisan sa siyudad nibutyag nga padayon ang ilang interogasyon sa suspetsado ug aduna sila’y nadawat nga taho nga posible nga gun-for-hire kini.

Giimbestigar pa usab sa kapolisan ang taho nga giingong ang suspetsado aduna kini kasong murder ug nalambigit usab sa pagpamaligya og ginadiling drugas. (BANAT NEWS)