Mga magtutudlo makadawat og overload pay

CEBU, Philippines — Gikalipay sa Department of Education (DEPED) sa Dakbayan sa Talisay ang bag-ong kamanduan sa paghatag og overload pay ngadto sa mga magtutudlo.

Si Dr. Arden Monisit, school division superintendent nagkanayon nga ang kamandoan makahatag og kadasig sa mga magtutudlo sa ilang trabaho ug makahatag pa kini og nindot nga produkto sa pagtudlo sa kabataan.

Ang kamanduan nadawat na ni Monisit gikan sa ilang ulohan nga buhatan nga nagmando nga mohatag lang og unom ka oras ang magtutudlo sa pagtudlo ug ang duha ka oras gamiton nila sa ilang pagprepar sa ilang klase.

Kung sila molapas sa walo ka oras mahimo gihapon sila makatudlo pero matagaan na kini og lahi sweldo. Si Monisit niingon nga iyang susihon sa kamanduan kung lakip ba nga matagaan og overtime ang mga magtutudlo nga maoy nagdumala sa kalihukan sama sa Sinulog, CVIRAA ug uban pa.

Hinuon nakahatag man sila og service credit sa magtutudlo pero angay lang nga ilang tan-awon kay lahi sab ang makadawat og extra nga sweldo gumikan sa gihagoan nga oras. (BANAT NEWS)