CCSC mahimong andam na sa Palarong Pambansa
CEBU, Philippines — Katunga na ang nahuman sa renovation sa Cebu City Sports Center ug gipaniguro ni John Pages, Chairman sa Cebu City Sports Commission nga maandam na kini panahon sa Palarong Pambansa.
Ang track oval gikatakdang ablihan sa Hunyo 20, usa ka buwan sa dili pa ang Palaro, nga magsilbi nga greenlight alang sa pagkompleto sa CCSC renovation.
“In fact nindot kaayo ni nga atong giagian ang CVIRAA, nga sama kadako sa Palaro, nga makatabang usab kanato sa pag-andam, sigurado ko nga adunay daghang mga pagkat-on sa umaabot nga mga semana sa atong pagpangandam alang sa national meet,” matud ni John Pages. Giingon nga ang CVIRAA maoy magsilbing simulation event sa Palarong Pambansa sanglit 90% sa mga playing venues mao ra sab sa pag-host sa Palarong Pambansa.
Sa laing bahin, si Pages nagkanayon nga sugod kagahapon, ang mga delegado gikan sa 20 ka participating division nagsugod na sa pag-abot sa dakbayan sa Sugbo alang sa CVIRAA meet. Ang opening ceremony karong Sabado, Mayo 4, 2024 nga ipahigayon sa South Road Properties (SRP) grounds. Sa bahin sa billeting quarters, ang mga delegado naobserbahan nga nagpahimutang sa ilang gi-assign nga quarters.
Sa usa ka pakighinabi sa media, si Aquilino T Milar Jr, IO DepEd Tagbilaran City Division miingon nga sila "satisfied" sa ilang na-assign nga quarters sa Lahug Elementary School. Si Milar niingon nga aduna silay kinatibuk-ang 687 ka mga delegado nga gilangkuban sa mga atleta, ug ilang technical ug working committee.
Samtang kabahin sa hagit sa krisis sa tubig sa dakbayan gipasaligan sila sa kagamhanan nga mahatagan ug igong suplay. (BANAT NEWS)
- Latest
