Minahan sa Alcoy subling gipasirad-an ni Garcia

CEBU, Philippines — Miluwat og laing cease and desist order si Gobernador Gwendolyn Garcia batok sa operasyon sa Philippine Mining Service Corporation’s (PMSC), human nga ang Court of Appeals (CA) sa desisyon niini nagkanayon nga balido ang niaging executive order nga iyang giluwatan pagpahunong sa operasyon sa maong kompaniya tungod sa kalapasan sa environmental laws.

 Ang CA mi-nullify sa kamandoan sa  Regional Trial Court (RTC) sa niaging tuig nga migrant sa aplikasyon sa kompaniya sa  writ of preliminary injunction pabor sa PMSC. Ang CA miluwat sa maong desisyon niadtong Abril 30.

“Considering the nullification of the order dated 26 April 2023, and the validity of Executive Orders 25-2020, 25-B-2020, and 7-2023, the Philippine Mining Service Corporation is hereby ordered immediately cease and desist all processing, selling, and transporting of dolomite and associated quarry resources,” pagbasa sa memorandum number 24-2024 ni Garcia.

Ang tulo ka executive orders nimando sa PMSC nga ihunong ang pagkubkob, proseso, baligya ug transport sa mga dolomite  ug ubang minerales sa lungsod sa Alcoy tungod sa giingong local tax ug environmental violations.

Apan sumala sa Kapitolyo, wala motuman ang maong mining firm sa kamandoan sa gobernador.

 Human giluwat ang Executive Order No. 7 ni Garcia sa niaging tuigz ang PMSC mipagawas og pamahayag ug nagkanayon nga sukad tuig 2020, nakadawat sila og upat ka local tax assessment sa Probinsya sa Sugbo kon diin giprotestahan na pud kini nila nga assessment.

“But since PMSC did not receive any reply from the province on the said protests, as mandated by applicable laws and jurisprudence, PMSC elevated the issue on the legality and validity of said tax assessments to the Regional Trial Court (RTC) of Cebu,” pagbasa sa pamahayag sa  PMSC penetsahan Pebrero 17, 2023.

Niadtong Pebrero  3, 2023, usa ka TRO ang giluwat sa RTC ngadto sa PMSC ug dayon  ang writ of preliminary injunction sa susamang bulan.

 Sa memorandum ni Garcia penetsahan Mayo 2, gimandoan ni Garcia ang munisipyo sa Alcoy, Philppine National Police, Mines and Geosciences Bureau ug Department of Environment and Natural Resources nga estriktong ipatuman ang maong memorandum.

Ang Philippine Coast Guard gitahasan pud nga siguraduhon nga walay barko ang makasulod sa pantalan sa PMSC hangtod nga adunay notisya.(BANAT NEWS)