Milyong Pinoy na nawalan ng trabaho dagsa sa pawnshops

MANILA, Philippines — Milyong Pinoy na nawalan ng trabaho ang dumaragsa sa mga pawnshops para magsangla ng mga alahas at iba pang mga kagamitan upang sagipin sa pagkagutom ang kanilang mga pamilya dulot ng COVID-19 pandemic.

Inihayag ito ni Cagayan de Oro City Rep. Rufus Rodriguez kasabay ng panawagan sa Bangko Sentral ng Pilipinas (BSP) na ibaba ang singil sa interes ng mga pawnshop ngayong patuloy na dumaranas ang bansa ng krisis sa kalusugan.

Sa House Resolution (HR) 1212 ni Rodriguez, sinabi nito na ang pandemya at lockdowns na ipinatupad ng pamahalaan ay nagdulot ng pagkawala ng trabaho ng milyong mga Pilipino.

Sa mga pawnshops bumabaling ang mga naghihirap na Pinoy dahil higit na mababa ang interes at konti lamang ang mga rekisitos kumpara sa mga bangko.

Pinuna ni Rodriguez na sa mga nakalipas na buwan ay mahaba ang pila ng mga nagsasangla ng mga alahas kung saan ang sitwasyon ay sinasamantala na ng mga pawnshop na itinataas ang kanilang lending rates.

“Because of this, many are deprived of their opportunity to earn, resulting in them being unable to pay their bills, including rent and utilities,” ani Rodriguez.