Wolves, Mavs magpinaksitay na

CEBU, Philippines — Sugdan na sa Minnesota Timberwolves ug Dallas Mavericks ang ilang best-of-seven NBA Western Conference finals karong adlawa didto sa Target Center sa Minneapolis, Minnesota.

Mag-abot sila sa korte sa alas 8:30 sa buntag.   

Ang Wolves mi-abante sa kampiyonato sa West human gipalayas sa ilang trono ang defending champion Denver Nuggets, samtang ang Mavs naka-angkon og luna sa conference finals human gipalagpot ang Oklahoma City Thunder.

Ang duha ka protagonista pangulohan sa batan-on nilang mga superstars.

Ang Wolves magsandig sa 22 anyos nga si Anthony Edwards, samtang ang Mavs maglaum sa abilidad ni Luka Doncic, nga maguwang og tuig ka tuig ni Edwards.

Ikatumpang ni Edwards sila si Karl Anthony-Towns, Jaden McDaniels, Mike Conley, Rudy Gobert, ug Naz Reid.

Sa habig sa Mavs, si Doncic makigtambayayong nilang Kyrie Irving, Derrick Jones Jr., P.J. Washington, Daniel Gafford, Dereck Lively II, ug Josh Green.