Gura mopas-an og bug-at nga misyon: Ikatulong boksidor sa ARQ nga manulong sa Japan

CEBU, Philippines — Sa iyang pagbiyahe ngadto sa Japan duha ka semana gikan karon, ang Sugboanong boksidor nga si Yeroge “The Scientific” Gura mobibit og dugang bagahe.

Kini mao ang pagputol sa duha ka sagunson nga pilde sa iyang mga kauban sa ARQ Stable sa maong nasud.

Ang 21-anyos nga si Gura (8-0-1, 3KOs) nanghinaut nga makab-ot niya ang malisud nga misyon sa dihang iyang sangkaon ang Hapon nga si Ayumu Sano (8-01, 4KOs) sud sa 10 ka hugna nga rambol alang sa World Boxing Council (WBC) Youth super flyweight title karong Hunyo 23 didto sa Twin Messe sa Shizuoka, Japan.

Si Gura ang ikatulo nga batos sa ARQ nga manulong didto sa Japan sud sa unom ka bulan. Ang nag-unang duha nangapakyas.

Si Johnpaul "Angas ng Cebu" Gabunilas napilde pinaagi sa kontrobersiyal nga 5th round TKO batok ni Kanamu Sakama niadtong Disiembre 26 sa miaging tuig didto sa Ariake Arena sa Tokyo.

Upat ka gabii pa lamang ang milabay, si Rodex "The Tank" Piala nakatilaw og pilde sa unang higayon pinaagi sa unanimous decision batok sa Hapon nga kampiyon nga si Kenji Fujita human sa 12 ka hugna nilang binukbukay alang sa World Boxing Organization (WBO) Asia-Pacific featherweight belt didto sa Korakuen Hall sa Tokyo.

Ang tahas anaa na karon sa mga kamot ni Gura nga manimawos batok sa mga Hapon nilang karibal.