Celtics mikulit og nba rekord bitbit ang ika-18 nga korona

CEBU, Philippines — Si Jayson Tatum mipaulbo og 31 puntos, 11 ka assists, ug walo ka rebounds sa dihang gipatikangkang sa Boston Celtics ang Dallas Mavericks sa hingpit pinaagi sa 106-88 nga demolisyon sa Game 5 sa best-of-seven NBA Finals kagahapon didto sa TD Garden sa Boston, Massachusetts.

Gihuman sa Celtics ang serye sa baraha nga 4-1 aron langkaton ang labing una nilang titulo sukad niadtong 2008.

"Oh my God. It's a surreal feeling. We did it," buhagay pa ni Tatum. "We did it -- oh my God, we did it! This is an incredible feeling. I'm lost for words. I'm sorry."

Gawas nga gibisbisan ang 16 ka tuig nilang huwaw sa korona, ang Celtics mikulit sab og rekord isip labing daogan nga team sa kasaysayan sa NBA bitbit ang 18 ka mga tropeyo sa kampiyonato.

Sa edad nga 35 anyos, si Joe Mazulla nahimo sab nga labing bata nga coach sukad ni Bill Russell niadtong 1969 nga nakampiyon.  Si Jaylen Brown midugang og 21 puntos ug maoy gibotohan nga Finals MVP.

Dako sab og naambag si Jrue Holiday nga mipupo og 15 puntos ug 11 ka rebounds alang sa Celtics, nga dominante na kaayo sukad gisirad-an ang unang kuwarter pinaagi sa nagkayong 12-3         run.

Wala na molingi pa ang Celtics sukad mi-establisar og 67-46 nga bentaha sa halftime human sa half-court buzzer beater ni Payton Pritchard.

Si Luka Doncic mihipos og 28 puntos ug 12 ka rebounds alang sa Mavs nga napakyas paglugway sa serye human gilampaso ang Celtics sa Game 4, 122-84. Sa gihapon, namugnaw si Kyrie Irving didto sa Boston diin siya nalimitahan ngadto sa 15 puntos human mipasud og lima lamang sa 16 niya ka itsa.

Taliwala sa ilang kapakyasan, si Doncic mapasigarbuhon gihapon sa nakab-ot sa ilang koponan.

"I'm proud of every guy that stepped on the floor, all the coaches, all the people behind," dason pa ni Doncic. "Obviously, we didn't win the Finals, but we did have a hell of a season and I'm proud of every one of them."