Gawas sa titulo, gura dunay laing misyon karon sa Japan

CEBU, Philippines — Maundang na kaha ang sagunson nga pilde sa mga batos sa ARQ Stable didto sa Japan?

Ang tubag ning pangutana anaa sa mga kamot ni Yeroge “The Scientific” Gura sa dihang makigsinukmagay siya sa Hapon nga si Ayumu Sano sa kulbahinam nga sanga tali sa way pildeng mga boksidor alang sa World Boxing Council (WBC) Youth super flyweight belt karong adlawa (Dominggo, Hunyo 23) didto sa Twin Messe sa Shizuoka, Japan.

Ang duha ka protagonista nagkupot og halos parehong rekord.

Si Gura nagtangag og 8-0-1 nga baraha uban ang 3KOs, samtang si Sano nabitbit og 8-0-1 nga marka uban ang 4KOs.

Labaw sa korona, si Gura dunay laing tuyo ug kini mao ang pagpakgang sa duha ka sunod-sunod nga pilde sa iyang mga katropa sa ARQ didto sa Japan.

Sa wala pa si Gura, sila si Johnpaul "Angas ng Cebu" Gabunilas ug Rodex "The Tank" Piala nanulong didto sa Japan apan pareho silang napakyas.

Si Gabunilas naparot pinaagi sa kontrobersiyal nga 5th round TKO batok ni Kanamu Sakama niadtong Disiembre 26 sa miaging tuig didto sa Ariake Arena sa Tokyo, samtang si Piala napukan sa unang higayon sa iyang karera pinaagi sa unanimous decision sabatok sa Hapon nga kampiyon nga si Kenji Fujita human sa 12 ka hugna nilang bugno alang sa World Boxing Organization (WBO) Asia-Pacific featherweight title didto sa Korakuen Hall sa Tokyo.

Ning higayona, si Gura mosuway pagputol sa ilang malas didto sa Japan.