UC Webmasters misilyo sa numero unong luna

CEBU, Philippines — Ang University of Cebu (UC) Webmasters midominar sa Cebu Institute of Technology-University (CIT-U) Wildcats, 84-65, aron pagpreserba sa perpekto nilang rekord sa Cebu Schools Athletic Foundation, Inc. (CESAFI) Season 24 men's basketball tournament niadtong Huybes sa gabii, Nobiyembre 14, didto sa Cebu Coliseum.

Si Danie Boy Lapiz mihipos og 13 puntos, tulo ka rebounds ug duha ka steals, samtang sila si Jhiey Paraldo, Ray Charles Libatog ug Jasper Pacaña mitali og 12 puntos matag usa sa dihang opisyal nga giangkon sa Webmasters ang numero unong luna padung sa giatngan nga Final Four uban ang 7-0 nga baraha.

Sila si Libatog ug Paraldo nagkumbinar sab og 21 ka rebounds, samtang si Ricofer Sordilla midugang og 11 puntos alang sa Webmasters, nga nanginahanglan og usa na lang ka daog aron kumpletohon ang makasaysayanong 8-0 sweep  sa eliminasyon.

Butang kini nga wala pa nilang mahimo bisan sa panahon ni June Mar Fajardo diin ang UC nakasakmit og duha ka sagunson nga kampiyonato niadtong 2010 ug 2011 seasons.

Makab-ot sa Webmasters ang maong dungog kon ugaling ilang mapilde ang Benedicto College (BC) Cheetahs karong Nobviembre 26.

Si John Rey Guinita mitali og 17 puntos samtang sila si Jerian Marc Abello ug Nono Matthew Paras nagkumboya'g 21 puntos apan nangahoyhoy ang ilang abaga tungod kay ang Wildcats natagak sa 2-4.

Duna pa hinooy tsansa ang Wildcats nga makatikang sa semifinals pinaagi sa simple tie batok sa University of San Jose-Recoletos (USJ-R) Jaguars kon ugaling modaog sila sa katapusan nilang duha ka duwa batok sa Cebu Roosevelt Memorial Colleges (CRMC) Mustangs ug BC Cheetahs.

Sa juniors division, si Jan Vince Oringo mikuha og atensiyon uban ang 18 puntos ug 13 ka rebounds sa dihang ang USJ-R Baby Jaguars nakalingkawas batok sa University of Cebu Lapu-Lapu and Mandaue (UCLM), 64-62, aron pagpabilin sa kinatas-ang dapit sa liderato bitbit ang 9-1 nga marka.

Hingpit nga mabira sa Baby Jaguars ang unang puwesto nga makahatag kanila og twice-to-beat advantage sa semis kon ugaling mabuntog nila ang CRMC Mustangs sa ilang sangka nga gikatakda sa alas-2 sa hapon karong adlawa (Sabado, Nobiyembre 16).