Bayugan Open Basketball Tournament UV Lancers mosikad na sa ilang kampanya

CEBU, Philippines — Ang two-time Cebu Schools Athletic Foundation, Inc. (CESAFI) defending champion University of the Visayas (UV) Green Lancers magsagubang dayon og malisud nga tahas pagsugod sa ilang kampanya sa Mayor Kirk Asis Open Invitational Basketball Tournament 2024 karong adlawa (Huybes, Hunyo 27) didto sa Lope Asis Memorial Gymnasium sa Bayugan City, Agusan del Sur.

Kini gumikan kay ang Bustamante Construction-UV Lancers ni coach Gary Cortes mokumbati sa duha ka duwa nga pipila lamang ka oras ang gintang sa usa'g usa sa buena manong aksiyon ning tulo ka adlaw nga torneyo nga nagdalit og dul-an sa P1 million nga ganting salapi.

Ang Lancers unang mosakbang sa Vincare Pharma-Perpetual Altas sa alas-8 sa buntag sa dili pa sila makigsangka sa Arianos Construction- Emilio Aguinaldo College (EAC) Generals sa alas-2 sa hapon.

Sama sa Lancers, ang ARQ Builders-Adamson University Soaring Falcons mowadwad sa korte sud sa duha sab ka higayon. Ilang harongon ang Wengburs Apartelle and Ella Store-San Beda Red Lions sa alas-10 sa buntag ug dayon makig-engkwentro sa Altas sa alas-6 sa gabii.

Sa main game sa alas-8 sa gabii, ang Red Lions makigpinaksitay sa Generals.

Si coach Van Halen Parmis, nga anaa karon sa ika-13 niyang tuig pag-organisa ning labing dako nga torneyo sa Caraga region diin libre ang tanan alang sa mga partisipante gikan sa ilang pagbiyahe, akomodasyon ug pagkaon, nagkanayon nga dunay madawat ang lima ka teams modaog man sila o dili.

Ang makampiyon mobulsa og P300,000, samtang ang mopahiluna sa ikaduha ngadto sa ikalimang dapit mokubra og  P200,000, P150,000, P100,000, ug   P75,000.

Dunay live streaming sa mga duwa sa Facebook page sa Mayor Kirk Asis Open Invitational Basketball Tournament, Down Under Promotions, ug Ka-Dayo.