Grasya sa ginoo alang ni Doc Bimbo Tequillo Nakasaksi og kasaysayan sa NBA uban ang anak niyang si Stefano    

CEBU, Philippines — Sangko sa laingit ang kalipay sa Sugbuanong sportsman nga si Dr. Bimbo Tequillo sa lain na sab niyang dili mahikalimtan nga kasinatian pagtan-aw sa NBA Finals.

Mao pa lamang kini ang ikaduha niyang paglarga didto sa Amerika sa maong katuyoan.

Niadtong 2015, si Tequillo mibiyahe sab og layo aron lamang pagsaksi sa kampiyonato tali sa Golden State Warriors ug Clevelend Cavaliers diin ang mga idolo niyang sila si LeBron James ug Stephen Curry nag-engkwentro alang sa labing dako nga dungog sa liga.

Ning bag-ohay pang natapos nga NBA Finals, si Tequillo mibira sa talagsaon nga oportunidad pagtambong sa sangka sa tali sa Boston Celtics ug Dallas Mavericks isip fan nilang Jayson Tatum ug Luka Doncic.   

Ning higayona, gikuyog ni doc Bimbo ang anak niyang si Stefano, nga nakadawat pa gani og Mavs Academy Certificate of Achievement nga gipirmahan mismo ni coach Jason Kidd sa pagsalmot niya sa 2024 Dallas Mavericks Hoop Camp samtang didto sila sa gibansagan nga Lone Star State.

"Ang nakalahi karon compared to my first NBA Finals kay first, kuyog akong anak and second, fan ko both ni Luka ug Tatum. So I was just a spectator, not rooting for either," matud pa ni Tequillo, nga usa sa mga haligi sa Sacred Heart Ateneo Alumni Basketball Athletic Association (SHAABAA).

Atol sa Game 5 sa best-of-seven series didto sa Boston, si Tequillo nakahigayon paghimamat nilang Brian Scalabrine, Eddie House, ug Kendrick Perkins, nga mga sakop tanan sa Celtics team nga milugwa nga NBA champion niadtong 2008.

Ang labing mahinungdanon kay si Tequillo nakasaksi og kasaysayanm sa dihang ang Celtics milampaso sa Mavs, 106-88, aron pagkulit og rekord bitbit ang ika-18 nilang kampiyonato sa NBA niadtong Lunes (Martes, Hunyo 18 oras dinhi sa Pilipinas).

"This esoteric experience though is very special kay naka-witness gyud ko og close out game sa NBA finals series and record pa gyud nga 18 championships," dugang pa ni Tequillo. Samtang nalingaw sa duwa sa labing nindot nga lingkoranan nga iyang nakuha didto sa TD Garden, si Tequillo nakadawat pa og dugang bonus gumikan kay naka-selfie siya uban ni head coach Joe Mazzulla samtanng ang Celtics nagselebrar sa bulawanon nilang kalamposan.

"Grabi akong kalipay nga naka-posing ko with coach Joe. Grabe kaayo iyang wisdom and humility.

Nakita sad ko nga taas kaayo ang respect sa iyang nga players niya," dason pa ni Tequillo agi'g pagdayeg ni Mazzulla, nga sa edad nga 35 anyos nahimong labing bata nga coach sukad ni Bill Russell niadtong 1969 nga migiya sa usa ka team ngadto sa kampiyonato.

Alang ni Tequillo, ang pagkasaksi niya og kasayaysan sa NBA nga nahimo pang mas bilihon kay nakuyog niya ang iyang anak usa ka gasa gikan sa kahitas-an, butang nga iyang handumon sa tibuok niyang kinabuhi.

"Grabe kaayo ko kalingaw. Pasalamat lang gyud ko sa Ginoo nga naka-experience ko ani. I consider this a very huge blessing especially nga nadala nako si Stefano," panapos pa ni Tequillo.