2kcares.org nakasagunson og daog sa SHAABAA

CEBU, Philippines — Sila si Ryan Lo ug Hanzel Uy parehong miposte og double-double sa dihang ang 2kcares.org nakaipsot sa Magis Medical Fund, 46-41, alang sa ikaduha ilang sagunson nga daog sa Sacred Heart Ateneo Alumni Basketball Athletic Association (SHAABAA) Season 27 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Si Lo mibubo og 13 puntos uban ang 17 ka rebounds ug usa ka steal, samtang si Uy mikolekta og 10 puntos, 11 ka rebounds, duha ka assists, ug tulo ka steals alang sa 2kcares.org, nga miangkon sa temporaryong liderato sa Division A uban ang 2-0 nga marka.

Si Jasper Salomeo milamas sa iyang nuybe puntos og 17 ka rebounds apan napakyas siya sa kampo sa Magis Medical Fund.

Sa laing bahin, si Derick Mangubat mipaulbo og 30 puntos, walo ka rebounds ug usa ka steal sa dihang ang GMall of Cebu mitunaw sa Yangtze Ice, 70-50, alang sa una ilang daog.

Sila si Paul Cabrera ug Andrew Eraso nagparamdam sab sa GMall of Cebu human nagkumboya'g 22 puntos. Si Benedict Chua maoy nangu sa Yangtze Ice bitbit ang 10 puntos.

Sa Division B, sila si Franco Augusto Te ug Ervin Lopena mikuha og atensiyon sa dihang ang 04 The Win Batch 2004 nakalingkawas sa Radius One Batch 2007, 65-62.

Si Te mitimbre og 15 puntos, 13 ka rebounds, upat ka assists, usa ka steal ug usa ka block, samtang si Lopena mibahug og 145 puntos, 11 ka rebounds, ug upat ka assists. Si Christopher Consunji maoy laing double-digit scorer sa Batch 2004 uban ang 11 puntos.

Sila si Brenon Gothong ug Mark Uykingtan nagkumbinar og 34 puntos apan way nahimo alang sa Batch 2007.

Sa ubang mga resulta, si Jan Galo mipatuasik og 28 puntos sa dihang gikastigo sa Subtero Batch 2006 ang Insular Square Batch 2005, 75-60, samtang sila si Gabe Branzuela ug Jasper Diaz nagkumboya'g 41 puntos ug 22 ka rebounds aron pangulohan ang ZLREJ Trading & Construction Batch 2010 ngadto sa 59-43 nga pagbugha sa ZeroNine Batch 2009.