IBP-Cebu kampiyon sa 2024 IBP-Eastern Visayas basketball tourney
CEBU, Philippines — Ang Integrated Bar of the Philippines-Cebu Chapter milampornas sa IBP-Cebu City, 72-53, aron sakmiton ang korona sa 2024 IBP Eastern Visayas Basketball Tournament niadtong Hunyo 12 didto sa Bohol Wisdom School (BWS) Gym sa siyudad sa Tagbilaran.
Si Emman Malazarte, nga kanhi varsity player sa Sacred Heart School-Ateneo de Cebu (SHS-AdC) Magis Eagles, maoy nangu sa IBP-Cebu uban ang 13 puntos.
Ang maanindot nga salida ni Malazarte sa tibuok nga bahin sa duha ka adlaw nga liga naghatud kaniya sa Most Valuable Player (MVP) award.
Si Jessie Capoy mikadlit sab og 13 puntos, samtang si Gerard Ace Pelare, ang tigpamaba sa Police Regional Office (PRO)-Central Visayas, midugang og 10 puntos alang sa IBP-Cebu, nga wala na molingi pa sukad mibulhot ngadto sa sayong 24-12 nga labaw.
Human giinat ang ilang bentaha ngadto sa 44-26 sa halftime, ang IBP-Cebu nakasustinir sa mainit nilang opensiba dayon na ngadto sa pagkab-ot og impresibong 19 puntos nga demolisyon. Ubos sa paggiya ni playing coach Bong Pepito, ang ubang mga miyembro sa IBP-Cebu team mao sila si Fermin Pepito, Ryan Sojor, Danrey Cabataña, Angelito Ortiz, Red de la Cerna, Barry Busi, Louys Llanos, Tito Apolinario, Edward Kong, Meg Miralles, ug RC Galo. Si Mike Hubahib maoy ilang team manager.
- Latest
