Labing unang korona sa PBA gisaytan sa Meralco

CEBU, Philippines — Ang Meralco Bolts mosuway pagsakmit sa labing una nilang kampiyonato sa PBA sa dihang ilang sangkaon ang San Miguel Beer sa Game 6 sa best-of-seven PBA Season 48 Philippines Cup finals karong adlawa (Dominggo, Hunyo 16) didto sa Smart Araneta Coliseum.

Magbangga ang duha ka puwersa sa alas 6:15 sa gabii.

Luyo sa pagmangtas nilang Allein Maliksi ug Chris Newsome, ang Bolts misikit og maayo ngadto sa makasaysayanong korona human giyabo ang Beermen sa Game 5, 92-88, niadtong Biyernes sa gabii.

Sila si Maliksi ug Newsome mipabuto og 22 puntos matag usa sa dihang ang Bolts miposte og 3-2 nga labaw sa serye.

Nanginahanglan sila karon og usa na lang ka daog aron kab-oton ang dungog nga dugay nang gihandum sa ilang prangkisa.

Kon molampus sila pagpatikangkang sa Beermen sa hingpit, ang Bolts mokatkat sa trono sa PBA sa unang higayon.

Sa wala pa ang engkwentro nila sa Beermen, ang Bolts nakataak na sa Governor's Cup finals upat na ka higayon sukad sila misud sa labing unang propesyonal nga liga sa Asya niadtong 2020.

Apan napakyas sila sa tanang higayon sa mga kamot sa Barangay Ginebra.

Karon ang bulawanon nilang tsansa nga bisbisan ang 14 ka tuig nilang huwaw sa titulo.