Nanoktok sa kasaysayan Celtics dili mokompiyansa

CEBU, Philippines — Tinguha sa Boston Celtics nga mokulit og kasaysayan sa dihang ilang sangkaon ang Dallas Mavericks sa Game 4 sa best-of-seven NBA Finals nga gikatakda sa alas 8:30 sa buntag karong adlawa (Sabado, Hunyo 15 oras dinhi sa Pilipinas) didto sa American Airlines Center sa Dallas, Texas.

Human sa 106-99 nilang pagpakaging sa Mavs niadtong Huybes, ang Celtics miinat sa ilang labaw sa serye ngadto na sa 3-0.

Tungod niini, ang Celtics nanginahanglan og usa na lang ka daog aron mokulit og NBA rekord uban ang 18 ka kampiyonato.

Sa kasamtangan, ilang gisaw-an ang dungog isip labing daogan nga team sa kasaysayan sa NBA uban sa Los Angeles Lakers bitbit ang tag-17 ka mga titulo. Selebrasyon na lang ang kulang sa Celtics gumikan kay sukad masukad, wala pay team nga nakabangon human malubong og 3-0 sa usa ka serye.

Bisan pa man niini, si Jayson Tatum nagkanayon nga wala pa mahuman ang tanan mao nang dili sila angayan nga mokompiyansa bisan gamay batok sa Mavs nga seguradong makigpatay didto sa ilang korte aron maka-angkon og lain pang kinabuhi.

"Even now, up 3-0, nobody is celebrating or anything," matud pa ni Tatum. "We still feel like there's a lot more that we can do. There's a lot more that we want to do."

Midugang si Tatum nga nakat-on gyud sila og leksiyon sa Eastern Conference finals sa miaging season diin sila miposte og 2-1 nga bentaha apan sa kinauwahian nahagba sa mga kamot sa Miami Heat sa Game 7 didto pa gyud sa ilang balwarti.

"I think from our experiences over the past couple of years, the thing that we've really gotten a lot better at is not relaxing, not being complacent," dason  pa ni Tatum.  Kon molampus sila pagpatikangkang sa Mavs sa hingpit, ang Celtics mamahimong ika-10 pa lamang nga team sa kasaysayan sa NBA nga naka-iskor og 4-0 sweep sa NBA Finals.  Ang katapusang nakabuhat niini mao ang Golden State Warriors batok ni LeBron James ug sa Cleveland Cavaliers niadtong 2018.