Magdaginot ta’g tubig

Gipahibawo ko sa labing dakong opisyal sa JE Hydro & Bio-Energy Corporation, nga wa pa momenos ang tubig sa limpyo nga sapa sa Barangay Lusaran nga ilang gikuhaan og tubig nga gi-suplay nila sa Metro Cebu Water District.

Si Engr. Joffrey Hapitan, chairman sa JE Hydro, mipahibawo nga bisan og panagsa na lang ang uwan apan wa pa mokunhod ang tubig sa sapa didto sa Barangay Lusaran mao nga naka-supply pa gihapon sila og kapin sa 20,000 cubic meters nga  tubig sa MCWD kada adlaw. Gipadad-an ko ni Engr. Hapitan og hulagway sa sapa sa Barangay Lusaran ug ingon man sa ilang pwerteng dakoa nga water reservoir nga puno pa gihapon sa limpyo na nga tubig.

Tungod niini, nakaingon ko nga wa gyud maproblema sa suplay sa tubig ang mga konsumidor diri sa Cebu City north district, dili sama sa ubang barangay didto sa south district sa Dakbayan sa Sugbo.

Samtang wa pa ko makaadto sa Jaclupan Dam sa Dakbayan sa Talisay, nga kuhaanan usab og tubig sa MCWD, apan ang Dam sa Barangay Buhisan, Dakbayan sa Sugbo, hubas na kaayo.

Tungod niini, awhagon nako ang mga konsumidor og tubig sa MCWD nga magdaginot gyud ta og tubig. Unya, kon pananglit mag-uwan gani, magsawod gyud og tubig-uwan aron atong magamit.

* * *

Nakasuroy na sab ko sa  habagatang bahin sa Sugbo gikan sa Dumanjug paingon dinhi sa siyudad, ug nakita nako nga pwerteng hinaya sa road widening projects sa Department of Public Works and Highways (DPWH). Wa na gani ko makakita og mga trabahador nga nagtrabaho. Ambot ngano kaha? Unya, gipangita nako ang lapad nga national highway nga gisugdan pagtukod sa DPWH gikan sa Naga paingon sa Minglanilla.

Kini kunong karsadaha nga naglumbay (parallel) sa karaang karsada, gitumong aron makatabag pagsulbad sa kahuot sa trapiko sa old national highway, apan ang problema kay nahunong sab.

Sugyot nako nga maayo unta kon ang DPWH mohatag og updates ngadto sa publiko sa ilang mga proyekto, apil niini ang paghimo nila og karsada nga magdugtong sa Barili agi sa Barangay Giloctog, paingon sa Aloguinsan lahos na sa Toledo. Laing naka-traffic ang mga tricycles nga gitugotan ra gihapon nga makadagan subay sa national highway, sama diha sa Minglanilla, San Fernando paingon na sa Carcar, makadugang kini sa kahaso l kay hinay man modagan ang mao nga matang sa sakyanan.

Dunay balaod nga ang mga tricycles dili gyud tugotan nga makabiyahe diha sa mga national highways, apil na kining mga Electric bikes, apan gipasagdan lang sa mga tinugyanan sa balaod.

Kining mga tricycle anha ra gyud unta sa mga interior roads. Katugotan sila nga motabok sa national highway, apan dili gyud sa karsada nga agianan sa mga dagkong sakyanan.