Tinuod nga tuyo sa kampanya
Pila ka adlaw human nabalita nga gitaktak sa Ombudsman si kanhi Mandaue City Mayor Jonas Cortes, nanawag ang akong kaila nga usa sa mga lider sa iyang karibal nga Kongresista Lolypop Ouano. Nangutana siya kon nakakuha na ba og temporary restraining order si Cortes batok sa Commission on Elections (Comelec) aron nga mabalik ang iyang ngalan sa balota.
Ako siyang giingnan nga wala maapil si Cortes sa pasiunang lista sa mga kandidato nga gitangtang sa Comelec gikan sa balota nga nakakuha og TRO sa Korte Suprema. Imbes malipay, naguol siya.
* * *
Nipasabot siya nga kon dili madayon ang kandidatura ni Cortes, magmingaw ang ilang kampanya. Kay si Cortes ang giisip sa mga Ouano nga labing dakong babag sa ilang ambisyon pagbalik sa City Hall. Para mga Ouano huyang ang ilang mga kaatbang kon wala si Cortes. Maong nahadlok ang akong kaila nga maapektuhan ang ilang panguwarta kon dili motinuod og gasto si Lolypop.
Malipayon siyang nipahibawo nako dihang sa kataposan nakakuha og TRO si Cortes. Ambot nahibawo ba si Lolypop unsay tinuod nga giapas sa pipila sa iyang mga lider.
* * *
Nakapahinumdom sa istorya sa barangay kapitan sa Davao City nga akong na-interview niadtong 2016 human nangangkon nga maoy nakakumbinser ni kanhi Presidente Rodrigo Duterte pagdagan: Nipasabot giunsa pagbaraw ang mas popular ug mas kuwartahan niyang mga kaatbang.
Dayong sumiter sa certificate of candidacy, nagpakuyog og reporters sa bangko ug nideklarar nga mogasto og minilyon pagpabilin sa puwesto. Walay nikontra niya. Ang tinuod nga rason nga nagpa-interview maong pagpahinumdom ni Duterte nga wala pa siya matudlo sa gisaad nga puwesto.
* * *
Mga pasalig sa dakong kuwarta nga ipabaha sa China maoy nakadasig sa lokal nga mga politiko, nga puslan mang gikontrahan o wala tagda sa administrasyon, pagpasilong sa partido ni Duterte. Ambot matuman pa bang pasalig karong napriso na si Duterte sa The Hague.
Pipila nila wala motinuod pagkampanya. Nipapilit lang sa higanteng mga letrato ni Duterte og sa posters nga giisa niyang ilang kamot. Wala kadasig nila ang kamingaw sa kataposang duaw ni Bise Presidente Sara Duterte sa Sugbo. Ambot nahibawo bang mga Duterte ug ang China sa tinuod nga tuyo sa mga nagsuporta nila.
* * *
- Latest
