EDITORYAL - Todo pamakak

Dili na ikahibulong bisan nasakpan na mohimakak gyud gihapon ang China nga nagpaluyo sila niining mga pagkatap sa mga fake news, misinformation ug disinformation diha sa social media.

Target sa maong operasyon mao ang pagdaut sa  mga gipanghimong polisiya sa gobiyerno para sa mga Pilipino, apil na ang mga aksiyon sa gobiyerno batok sa pagpangilog sa China sa mga teritoryo sa Pilipinas diha sa West Philippine Sea.

Apil sa matud pa gipuntariya ang mga kandidato sa umaabot nga eleksiyon samtang gipahumot sab ang pikas nga grupo nga gipanglantawang mabulahan ang China kun sila maoy makadaug ug makalingkod sa pwesto human sa eleksiyon karong Mayo.

Ang pasangil nagagikan mismo kang National Security Council (NSC) Spokesperson Jonathan Malaya  atol sa Senate hearing niadtong adlaw nga Huwebes.

Matud pang Malaya dunay mga indikasyon nga dunay kalambigitan ang China sa “information operations” nga makaapektar sa resulta unya sa eleksyon karong Mayo.

Atol sab sa maong hearing, si Senate Majority Leader Francis Tolentino mipresentar og matud pa niya kontrata tali sa Chinese Embassy sa Manila ug sa usa ka marketing firm sa Makati City nga gitawag og Infinitus Marketing Solutions Inc.

Matud pa sa senador, ang kontrata naghisgot sa pag-hire sa maong firm og mga "keyboard warriors" aron mopakatap og mga pro-China messages ug atakihon o dauton ang mga magbabalaod ug mga kandidatong dayag nga nidepensa sa soberiniya sa Pilipinas diha sa West Philippine Sea.

Apan ang foreign minister sa China nihimakak aning tanan. Matud pang Chinese Foreign Ministry spokesperson Guo Jiakun wala manghilabot ang China ug dili kini magapil-apil sa eleksyon dinhi kay wala silay interes niini. Kaha?

Sa naghinapos nga bahin sa miaging tuig daghang nanggawas nga mga kadudahang mga posts sa social media nga nagbahad nga dunay mahitabong ‘civil war’ sa Pilipinas ug nga ang Mindanao mobuwag sa nasud.