Nisumbalik

Sa bag-o lang nahuman nga ASEAN Defense Ministers Meeting (ADMM) dinhi sa Sugbo gisuwayan sa China og pakauwaw ang Pilipinas atubangan sa mga opisyal sa ASEAN ug mga dialogue partners gamit ang karaang paagi sa panlingla.

Sa pagtuo nga ilang ma-hostage ang ubang mga nasud ug malingla aron mosuporta sa ilang mini nga kawsa pagpangilog og teritoryo, wala motungha ang defense minister sa China ug maoy ilang gipadala isip representante ang usa ka military attache gikan sa ilang embahada sa Manila.

Dili pa igo ang ilang panginsulto sa Pilipinas nga maoy host ug sa ubang mga delegado, nagdrama dayon ang Beijing pinaagi sa pagluwat og pamahayag nga kunohay gisabutahi sila.

Ilang buot patuohon ang ubang mga opisyal sa ASEAN ug mga dialogue partners nga gibabagan sa Pilipinas ang ilang presensiya sa tigom.

Apan wala mosaler ilang drama tungod kay way bisan usa ka membro sa ASEAN ang mituo sa ilang drama.

Hinuon misumbalik sa China ilang gibuhat nga pakauwaw. Ibabaw sa kalibutanong entablado nanlipaghong ang China dihang gipakaminus sab sa Pilipinas ang pagdawat sa ilang gipadala nga representante.

Inay si Defense Secretary Gibo Teodoro ang mosugat sa ilang representante, usa ka defense undersecretary maoy nitagbo tumbas sa ranggo sa opisyal nga ilang gipadala.

Nisumbalik ilang panginsulto nga daw sama sa usa ka boang nga nangluwa paingon sa taas nitugpa sa nawong ang iyang kaugalingong laway.