20k ra ang presyo sa kinabuhi

Good job Cebu City Police Office sa malamposon nga pagsulbad sa nahitabong pagpatay sa usa ka babaye nga nag-angkas sa motorsiklo dapit sa Barangay Luz. Nalit-ag nila ang 24-anyos nga lalaking miangkon nga mipatay sa biktima.

Siyam ka adlaw nga gitrabaho sa kapolisan ilabi na sa Mabolo Police Station ang pagsikop sa suspek, nagpasabot nga dili hilaw ang ilang lihok basta lang masulbad.

Mao ni ang angayan nga himoon sa mga tinugyanan sa balaod, systematic ang pagsulbad sa krimen, segurado nga walay kwestyon kay backed up man og mga ebidensya nga ang ilang gidakop mao gyud ang ilang gipangita.

Nataodtaoran man pero ok lang kay natumbok man gyud nila ug natuman ang saad sa kapolisan ngadto sa pamilya sa biktima nga dili pa ilubong ang babaye masulbad ang krimen. Angayan nga daygon ang ilang gihimo for the job well done CCPO.

Gidetalye sa CCPO ang proseso gikan sa ilang imbestigasyon hangtod na sa pagsikop sa suspek ug nakuha nila ang tanang ebidensya lakip na ang mga gisul-ob nga sapot sa pahimo sa krimen, motor nga gisakyan ug ang awto nga gibalhinan sa suspek pagsibat diin mao usay nakita sa CCTV sa dapit diin nahitabo ang krimen.

Wala na nakalimod ang suspek kinsa miangkon sa krimen dihang nadakpan sa mga otoridad ug igo nalang nakapangutana nganong natultolan siya.

Gitubag siya ni Col. Enrico Figueroa, ang Director sa CCPO nga ingon niana ka maayo ang mga pulis sa dakbayan sa Sugbo nga mangita sa mga nalambigit sa krimen.

Ato pud ilhon ang hago ni P/Major Romeo Caacoy, ang Hepe sa Mabolo Police Sation, nga maoy nangulo sa operasyon ug kauban ang mga opisyal sa kapolisan.

Dili lang ta mosaway kon dili ilhon pud nato ang kaayohan nga gihimo sa mga otoridad bisan pa man og aduna gyuy mga panghitabo nga dili kalikayan sama sa mga krimen sa palibot apan masolbad ra man usab.

Sa pag-angkon sa suspek, gibutyag niya nga igo lang siya gisugo sa mastermind pagpusil sa biktima sa kantidad nga P20,000. Ingon niana ang presyo sa kinabuhi nga kutloon tungod sa wala pa matugkad nga rason kay wala pa man madakpi ang utok sa krimen.

Igo nalang mipabuhagay ang suspek sa iyang pagbasol dungan sa pagpangayo og pasaylo kay natintal lang siya sa tinagingting sa 20 mil pesos nga serbisyohan niya sa bilanggoan ilabi na kong makonbikto siya sa kasong murder nga ipasaka niya.