Siyaok nga makasiyok

Giluod na ang katawhan sa bati kaayong pamaagi niining pagpamunoan ni Presidente Bongbong Marcos Jr. (PBBM), diin inay tutokan sa iyang administrasyon ang tukmang sulbad sa daghang problema sa Pilipinas gikan sa pagkaon, edukasyon, moralidad, seguridad, kapanginabuhian ug uban pa, mao hinuoy gipunayag punting ang pagdemolis ni kanhi Presidente Rodrigo Roa Duterte (PRRD), Bise-Presidente Sara ‘Inday’ Z. Duterte ug sa pamilyang Duterte diha sa ilang dalan sa natad sa politika. Sanglit giisip man nila ang mga Duterte nga dakog babag sa ilang nag-ikis-ikis nga pagpadagan sa atong nasud.

Namatikdan-nasinati! Nga niining administrasyong Marcos mibaha sa kadalanan ug sa mga kasuokan ang pagpayuhot ug paggamit sa mga gidiling drugas. Tulis, lugos, patay, akyat-bahay, hold-ap ug uban pang matang sa krimen nga kanhi sa pagpamunoan ni PRRD mihinay na unta, karon namalik na usab.

Dili na luwas ang mga hilithilit dapit bisan na sa adlawan.

Mga pulidong rason nganong gimingaw na kaayo ang kinabag-ang hut-ong sa katilingban sa nagustohan nilang matang sa pagpangalagad ni Tatay Digong, diin hasta mga OFW, kinsa atua na sa mga lagyong lugar nanginabuhi, nakatilaw gihapon sa kainit-kamapinanggaong gakos sa usa ka tinuorayng amahan panahon sa ilang panginahanglan.

Samot na, sa mga batang cancer patients nga iya g'yung duawon sa ospital ug hagkan; sa mga sundalong nangaigo sa gubat-nalanding sa tambalanan nga iyang bisitahon, dunolan og sobre sa hinabang pinansiyal-taoran og medalya pasidungog; sa mga lumolupyo nga biktima sa bagyong Yolanda ug sa ubang kalamidad, diin mag-una gyod pirme si PRRD pagtunol og mga dinagkong tabang.

Busa, kinsa bang kasingkasinga ang dili mahigugma tungod sa mga maayo niyang binuhatan?

Mao nga dili na ikahibulong, nga bisag Team-Marcos, ang higanteng kaatbang sa Team-Duterte maoy mopasiugda og campaign rally alang sa nagsingabot nga midterm election, kalit lang adunay magdungan sa pagsinggit-siyaok og:

“Duterte! Duterte! Duterte!” Ug wala lamang kini mahitabo didto sa Luzon ug Mindanao. Bisan dinhi sa Visayas, sa Cebu, daw nauso na!

Luoy kaayo ang politiko nga nagdiskurso, uy! Kay mora g'yud og isdang naigo sa dinamita nga misiyaok sa tumang kakusog ug nakapasiyok sa iyang mga dalunggan.

Nakurat, naigking ug nanglipaghong intawon!

Tilimad-on kaha kini nga ang Pilipinas, Duterte pa rin?