EDITORYAL - Kakahiya sa mga dayuhan at turista
Mula Enero hanggang Marso 5, 2024, mahigit 1.2 milyong turista na ang bumisita sa bansa, ayon sa Department of Tourism (DOT). Kabilang sa mga ito ang 1,160,129 na dayuhan at 67,686 na Pilipinos na naninirahan sa ibang bansa. Mas marami ang bumisitang turista ngayong taon kumpara sa nakaraang taon na umabot lamang sa 999,390. Ang South Koreans ang pinakamarami sa mga dayuhang bumisita na sinundan ng Americans, Chinese, Japanese, Canadians, Australians, Taiwanese, British, Singaporeans at Germans.
Ayon pa sa report, daragsa pa ang mga turista sa pagsisimula ng tag-init na opisyal na magsisimula sa Abril. Ang Abril at Mayo ang pinakamainit na buwan sa Pilipinas na gustung-gusto naman ng mga dayuhan. Nagbababad sila sa magagandang beaches sa bansa partikular na ang Boracay, Puerto Galera at sa mga makapigil-hiningang tanawin sa Palawan. Maganda namang di-hamak ang mga beaches sa Pilipinas kumpara sa ibang bansa.
Ang isang problema, maaaring mag-atrasan ang mga turistang patungo sa Pilipinas kung hindi masosolusyunan ang pag-atake ng mga peste sa Ninoy Aquino International Airport (NAIA) na kinabibilangan ng surot, daga at ipis. Hindi maganda na ang mga pesteng ito ang sasalubong sa mga turista.
Noong nakaraang linggo, nag-viral sa social media ang mga na-videohang surot sa mga upuan sa Terminal 2 and 3. Nagkapantal-pantal ang katawan ng mga nakagat ng surot makaraang maupo sa mga metal na upuan.
Hindi pa humuhupa ang pagsalakay ng surot, na-videohan naman ang pagala-galang daga sa kisame ng Terminal 2. Marami ang nahintakutan sa malaking daga na anila’y kasinglaki ng pusa.
Pagkatapos ng naispatang daga, nag-viral naman ang mga nakitang ipis sa mga nasabi ring terminal. Marami at nakadidiri ang mga ipis.
Nagpapakita lamang na ang paglitaw ng mga peste sa NAIA ay dahil sa kapabayaan ng mga namumuno. Kung maayos at ginagampanan nang maayos ang pamamahala, hindi magkakaroon ng peste.
Masasayang ang ginagawang pagpu-promote ng DOT na bumisita ang mga dayuhan o turista kung makakaranas ng hindi maganda sa airport. Paano masisiyahan ang turista kung sa pag-upo niya sa mga upuan ay papapakin ng surot ang kanyang hita at puwit. Paano masisiyahan kung may gagala-galang daga at naglisaw na ipis.
Ang mabilis at epektibong aksyon sa NAIA kaugnay sa mga naglutangang peste ay nararapat na solusyunan. Kapag natatak sa isipan ng mga turista ang mga peste sa NAIA, hindi na sila uulit pa. Kawawa ang Pinas na hindi na mamahalin.
- Latest
