Kauna-unahang digital PET/CT scanner, parating na sa Makati!

Dito sa ating bansa, napakaraming kaso ng cancer at mga problema sa puso kada taon. Ayon sa mga eksperto, #3 leading cause of death na sa Pilipinas ang sakit na cancer. Sinabi rin ng Philippine Institute for Development Studies o PIDS na mayroong 25,000 bagong kaso ng cancer sa bansa taun-taon at karamihan dito ay breast cancer. Sa mga nasabing pagsasaliksik ay parating binibigyang diin na puwede sanang maiwasan ang pagkamatay ng mga pasyente kung na-detect nang maaga ang cancer. Early detection at prevention ika nga, kaysa naman gagamutin lamang ang sakit kapag nasa malalang stages na ito.

Noong nakaraang linggo, may isang malaking develop­ment sa healthcare delivery services system ng Makati. Magkakaroon na ng state-of-the-art Digital AI PET/CT scanner sa Makati Life Medical Center sa ikatlong quarter­ ng taon. Ang good news, magagamit ito nang libre ng Yellow Card holders at kanilang dependents na wala pang 21 taong gulang. Ito ang kauna-unahang imaging system ng ganitong kalibre sa bansa.

Ang PET/CT uMI 550  ay makakapagbigay ng mas malinaw na image para maagap na malaman at magamot ang maraming uri ng cancer, mga sakit sa puso at neuro­logical conditions. Sa pamamagitan ng artificial intelligence ay makatutulong ito sa mga doktor sa pagdedesisyon at pag­sasagawa ng mas angkop at epektibong paggagamot.

Ang pagkakaroon ng digital PET/CT scanner ay bahagi ng pagsusumikap ng lungsod na gawing abot-kamay ng Ma­katizens ang pinakamahusay na healthcare technologies­. Hindi dapat maging hadlang ang estado sa buhay sa kaka­yahang makapagpagamot at magkaroon ng access sa ad­vanced medical treatments. Mauumpisahan na ang pag­­gamit ng nasabing scanner sa Makati Life Medical Center sa third quarter ng taon.

Sa kasalukuyan, bukas 24/7 ang outpatient department­ ng Makati Life Medical Center upang magbigay ng access sa mga residente ng Makati at pribadong pasyente sa healthcare, consultations, diagnostic, at pharmacy services. Magi­ging fully operational ang 360-bed hospital sa pagtatapos ng taong ito. Mayroon itong iba’t ibang specialized centers na may mga  pinakabagong kagamitan sa medical techno­logy at modernong pasilidad. Nakatutok ang mga ito sa pre­vention, treatment, at rehabilitation sa iba’t ibang specialties­.

Malapit nang matamasa ng Yellow Card holders ang lahat­ ng mga serbisyo at procedures na ito nang libre. Konting-konti na lang at mababago na natin ang sistema ng healthcare services delivery sa bansa. At dahil nga prevention ng sakit ang gusto nating i-promote, hinihikayat ko ang mga Yellow Card holders natin na may edad 40 pataas na magpagawa ng kanilang annual physical examination sa Makati Life. Higit pa ito sa basic check-up at labs dahil kasama rin ang screening para sa metabolic, lipid, liver, kidney profiles, at iba pa, na nakakapagbigay ng kumpletong health assessment para sa mga indibidwal.

Para magpa-schedule ng appointment o may katanungan, puwedeng tumawag sa Makati Life sa  (02) 8888-2020 o mag-message sa 0917-658-5433 or 0947-990-7362.